నా భావనలు......

నది నడచిన జ్ఞాపకం

2012-01-14T19:55:00.005+05:30

సంక్రాంతి వచ్చిందంటే
మా ఊరిలో దాచుకున్న
జ్ఞాపకాల మూటని విప్పుకుంటాను
అడుగడుగున గొబ్బెమ్మలు
అందమైన ఆడపడుచులు
గొబ్బెమ్మల ఆటపాటలు
గంగిరెడ్ల నృత్య విన్యాసాలు
డూడూ బసవన్న గంటల గలగలలు
హరిదాసుల హరినామ స్మరణలు
ఇలా ఎన్నో ఎన్నెన్నో
అదృ శ్య దృశ్యాల మీద
నగ్నంగా విహరిస్తూంటాను

నాఊరి గడప గడపనుండి
సంక్రాంతి సంస్కృతీ నది
వీధి వీధినా నడిచిన జ్ఞాపకం....

నగరీకరణ వరదలో
నా ఊరు..
నీరు లేని నదిలా
నగరంలో నేను
నీరులేని చేపలా

బ్లాగ్మిత్రులందరికీ సంక్రాంతి శుభాకాంక్షలు

నేను చూసిన రెండు రెండు వేల పన్నెండ్లు ...

2012-01-01T08:34:00.001+05:30

నిన్న అన్నయ కి బాగాలేదని ఫోన్ వస్తే నేను జ్వరం తో కొద్దిరోజులుగా బాధ పడుతున్నా
కాకినాడ వెళ్ళాను.
రాత్రి 8.00 గంటలకి విశాఖ నాన్ స్టాప్ బస్సెక్కాను. బస్టాండు చాలా తక్కువమంది జనంతో ఏదో కోల్పోయినట్లుంది. నిజమే 2011ని కోల్పోతున్నాం కదా..దాన్ని వేడుక చేసుకునేందుకు ప్రజలందరూ బిజీగా ఉన్నారేమో. (నిరాశా వాదమా ??)
విశాఖ పట్నం ఎన్.ఏ.డి జంక్షన్లో అడుగు పెట్టేసరికి సరిగ్గా రాత్రి 12.00.. అప్పటికే అక్కడ చేరిన యువత కేరింతలతో బాంబుల మోతతో జంక్షన్ దద్దరిల్లుతోంది. జంక్షన్ నుండి నేను పెందుర్తి వైపు వెళ్ళాళి. ఆటో కోసం నిలబడ్డాను. నాలా బస్సు దిగినవాళ్ళు నలుగురైదుగురుం ఉన్నాం. మామూలుగా అయితే ఆ టైములో జంక్షన్ నిర్మానుష్యంగా ఉంటుంది. చాలాసేపు వెయిట్ చేస్తేనే గాని ఆటో దొరకదు. లక్కీగా ఒక కుర్రాడు ఆటో మా ముందుకి తీసుకొచ్చి ఆపాడు..
అందరం గబగబా ఎక్కేసాం. నరాల్ని కోసే స్తున్నట్లు చల్లగాలి. స్పీకర్లోంచి 100% లవ్ సినిమా సాంగ్స్ సన్నగా, మెలోడియస్ గా వినబడుతున్నాయి.
దారి పొడవునా మత్తులో ఊగిపోతూన్న కుర్రకారు మా ఆటోకి అడ్డంపడి మరీ మా అందరికీ హేపీ న్యూఇయర్ విషెస్ చెపుతూ ఆనందిస్తున్నారు.
మా ఆటో కుర్రాడు మాత్రం పైకి నవ్వుతూ విషెస్ చెపుతున్నా లోపల గంభీరంగా ఉన్నాడని పించింది.
నువు నీ ఫ్రెండ్స్ తో ఈ టైములో ఎంజాయ్ చేయకుండా ఆటో ఎందుకు వేసావ్.. ఉండలేక అడిగాను.
ఏం లేదు సార్... ఈ రోజుతో దీని ఫైనాంస్ తీరిపోయి రేపటి నుండి ఈ ఆటో నా స్వంతమవుతుంది సార్. ఈ రోజు కోసం ఎన్నో రోజులనుంచి ఎదురు చూస్తూన్నాను. నిజానికి ఇలా హేపీ న్యూ ఇయర్ సెలబ్రేట్ చేసుకోవడం సంతోషంగా ఉంది సార్..
భాద్య్తత మరిచి మత్తులో తూలుతూ 2012 లోకి అడుగు పెడుతూన్న యువత ఒకవైపు ...
బాధ్యతని భుజాన్నెత్తుకుని లక్ష్యం దిశగా 2012 లోకి దూసుకు పోతూన్న యువత ఒకవైపు...

బ్లా గ్మిత్రులంద రికీ నూతన సమ్వ త్సర శుభాకాంక్షలు

కలాల కోలాహలం

2011-12-19T21:54:00.005+05:30

నిన్నటి రోజున కవన భోజనం.
మా విశాఖ పట్నం మరియు ఉత్తరాంధ్రాకు చెందిన రచయితలు, కవులు సాహితీ సమ్మేళనం ఘనంగా జరిగింది.

కలాల కోలాహలం
(సాహితీ సమ్మేళనం)
వివిధ సాహితీ ప్రక్రియలపై పోటీలు, ప్రసంగాలు, రచనా పఠనాలు, కవి సమ్మేళనం తదితర
అంశాలపై పోటీలు నిర్వ హించారు.
అవధాన ఘనాపాటి డా. గరికపాటి ముఖ్య అతిధిగా సుప్రసిధ్ధ రచయిత్రులు, రచయితలు పాల్గొని
కార్యక్రమాన్ని విజయవంతం చేసారు.

కార్యక్రమమ్లో సత్యమూర్తి చారిటబుల్ ట్రస్ట్ చైర్మన్ శ్రీ మోదు రాజేశ్వరరావు,
సృజన..విశాఖ కార్యదర్శి గుండాన జోగారావు, కార్యవర్గ సభ్యులు శ్రీ బి .దుర్గా ప్రసాదు విశాఖ సాహితీ మిత్రులు మరియు పాత్రికేయులు పాల్గొన్నారు.

ఉదయం తొమ్మిది గంటలనుండి సాయంత్రం ఆరు గంటల వరకూ సాగిన ఈ కార్యక్రమం లో వివిధ పోటీల విజేతలకు బహుమతి ప్రదానం కూడా జరిగింది.
సాహితీ ప్రియులందరూ సంతోషించ దగిన విషయమేమంటే
వచ్చే సమ్వత్సరం ఏప్రిల్ నెలలో
మా విశాఖ పట్నం లో
జాతీయ తెలుగు రచయితల మహా సభలు
జరగనున్నాయి.
దానికి సంబంధించిన విధి విధానాలను, తాత్కాలిక కార్యవర్గ కమిటేని ప్రతిపాదించటం కూడా జరిగింది.

మా సృజన...విశాఖ

2011-09-19T05:15:00.004+05:30

ప్రతీ నెలా మూడవ ఆదివారం మా సృజన...విశాఖ వైవిధ్య భరితమైన కార్యక్రమాలతో సాహితీ ప్రియులను అలరిస్తోంది. గత రెండేళ్ళకు పైగా ఔత్సాహిక కవులు, కవయిత్రులూ, రచయితలూ, రచయిత్రులకు, భావావిష్కరణ వేదికగా నిలుస్తోంది. ఈ సంస్థ లో కార్యవర్గ సభ్యులు గా నావంతు సాహితీ సేద్యం చేస్తూంటాను.
మా సృజన...విశాఖ రక రకాల పోటీల తో మేధకు పదును పెట్టి కలంతో కలకలం సృష్టించమని పెన్నుతట్టి ప్రోత్సహిస్తుంది. భావ పుష్కలత కలిగి అక్షరాలకు నగిషీ చెక్కాలనుకునే వారికి, ప్రముఖుల అమూల్య సలహాలందించే వారధిగా భాసిల్లుతోంది.
కొత్తనీరుని స్వాగతిస్తూ, పాతనీటి మధురిమల్ని అనుసంధానిస్తూ ఒక వినూత్న సాహితీ వాతావరణానికి ప్రతీకగా విరాజిల్లుతోంది.
అయితే ఈ రోజు నుండి మా సమాఖ్య కార్యకలాపాలని బ్లాగ్లోకంలో
పెట్టాల నే ఆలోచన వచ్చింది.
మా కార్యక్రమాల్లో భాగంగా ఈ నెల సృజన...విశాఖ ఆధ్వర్యంలో ప్రముఖ కవి, రచయిత,వ్యాసకర్త, చరిత్రకారుడు, బహుభాషా కోవిదులు పుదుచ్చేరి రాష్ట్రప్రభుత్వంచే ' తెలుగురత్న ' బహుమతి గ్రహీత , సువర్ణశ్రీ బొల్లోజు బసవలింగం స్మారక సాహితీ పురస్కారాలు పేరిట ' పోస్టుకార్డు కవితల పోటీ ' నిర్వహించాము. బహుమతి పొందిన వాటిని ఇక్కడ చూడచ్చు.

పంచ మార్గాలు

2011-09-06T22:58:00.003+05:30

గురువు ని ఎంతో ఉన్నత స్థానంలో ఉంచింది మన సంస్కృతి. గురువు వద్ద శిష్యుడు ఏ విధంగా ఉండాలి ? ఏ రకమైన శుశ్రూషలు చేయాలి. గురువు నుండి జ్ణానాన్ని ఎలా సంపాదించాలి. ఇవన్నీ కూడా మనం మన శాస్త్రాలలో తెలుసుకున్నాం. అయితే గురువు ఏ విధంగా శిష్యునితో మెలగాలి అనే విషయం మీద శాస్త్రాలలో ఈ విషయాలు మనకు కనపడతాయి.
ప్రధానంగా గురువు ఐదు మార్గాలలో శిష్యుణ్ణీ గురువు, గురువుని శిష్యుడు అంటిపేట్టుకుని ఉండాలట.
పంచ మార్గాలు :
1. కపి మార్గము : కోతి పిల్లలు తమ తల్లి ఎచ్చటకు పోయినను పట్టుకున్న రీతిగా, ఉపధ్యాయుని శిష్యులు వదలకుండా ఉండాలట.

2. విహంగ మార్గము : పక్షి తన గ్రుడ్లను పెట్టి దాని రెక్కలచే మూసి యుండుట వలన అవి పిల్లలైనట్లు గురువు శిష్యులను విడనాడక వృధ్ధి లోనికి తీసుకు రావాలట .

3. మార్జాల మార్గము: పిల్లి తన పిల్లలను నో ట కరచుకొని ఎల్ల చోటులకు తీసుకొని పోవునటుల ఆచార్యుడు తా బోవు చోట్లకు గొని పోవుచూ వృ్ధ్ధి కి తెచ్చుట.

4. మీన మార్గము : చే ప గ్రుడ్లను పెట్టి వానిని తిరిగి జూడ, జూడనవి అభివృధ్ధి నొందినట్లు గురువు అప్పుడప్పుడు వచ్చి, వృధ్ధికి రావలినని కటాక్షించుట.

5. కూర్మ మార్గము : తాబేలు ఒక చోటున గ్రుడ్లను పెట్టి మరియొక స్థ్లలము నకు పోయి వాని నవరతము తలచుచుండగా, వృ ధ్ధికి వచ్చినట్లు, గురువు తన శిష్యులను అప్పుడప్పుడు తలచుచుండుట.

చూసారు కదండీ...వింతగా లేవూ...

If you are a parent

2011-09-05T23:07:00.001+05:30

If you are a parent, I suppose you have many aspirations for your child that include him or her becoming a doctor, an engineer, scientist or another kind of successful professional. I believe that these aspirations are driven by your thinking about your child's future, and her centrality in your life.

Since good education is often the passport to a good future, I presume it leads you to getting your child admitted to a good school. Then you encourage your child to study hard to do well in school exams. To booster this, you send him or her to tuition classes. This would have primed your child for board exams and entrance exams, thereby leading to admission into a good professional course. Doing well at college increases the probability of landing a good job. And a good job means that the child's future is ensured.

I am neither a psychologist nor an educationist, and what I will now state may seem కౌంటర్ intuitive. I think that these aspirations and actions might be doing more harm than good to your child. To understand why, we need to re-examine some of our fundamental assumptions.

In the first place, I have seen time and again that living for some distant future goal also means you do not live in the present. The distant goal will always translate into an external measure of success, such as exams. And most exam-focused children start forgetting what it means to be a child – to be curious, mischievous, exploring, falling, getting up, relating, discovering, inventing, doing, playing. Childhood is very precious; precious enough not be wasted by the artificial pressures of contrived competition, by too many hours of bookish study, and by school report cards that simplistically wrap up an entire human being in numbers.

The second assumption is that education is merely a ticket to socio-economic success. Given the state of our country, this reality cannot be ignored. But restricting education to only to this aspect, is I think, a very limiting notion of the aim of good education. The primary purpose of a school is to guide the child in her discovery of herself and her world, and to identify and nurture the child’s talents. Just as every seed contains the future tree, each child is born with infinite potential. Imagine a school which sees children as seeds to be nurtured – here the teacher is a gardener who helps to bring out the potential already present in the child. This is very different from the current view which sees the child as clay to be molded – where the teacher and parents are potters deciding what shape the clay should take. There is an old (and forgotten) Chinese saying, “Give a seed to a potter, and you will get a bonsai “.

Even in a commercial organization, to make profits we do not have to chase profits. Rather, we need to build an institution that gives every employee an opportunity to do meaningful and fulfilling work. We need to create an organization driven by values of innovation, integrity, customer centrality and care. And as you practice these values everyday and moment you will see that the profits take care of themselves.

Similarly, dear parent, this is my request to you. Do not give up your child’s present to secure his or her future. Give your child the freedom to explore life truly and with abandon. In doing this, you will see your child flower into a creative and sensitive human being. And when this happens, everything else – money, social success, security – will fall into place automatically.

Let your child be a child.

హ్యాపీ టీచర్స్ డే

Azim H Premji

Chairman, Wipro

పసుపు వినాయకుని పూజ అవసరమా ?

2011-09-01T21:10:00.009+05:30

వినాయక వ్రతం చేయునపుడు పసుపు వినాయకుని పూజించడం అవసరమా ?
సాధారణంగా మనం ఏదైనా వ్రతం చేసేటపు డు గాని ఇతర దేవతలని పూజించే సమయంలోనో , మరే ఇతర శుభకార్యమయినా జరిపేటపుడు విఘ్నం కలుగకుండా వినాయక పూజ చేయడం మొదటి పుజలందుకునే ఆ విఘ్న నాయకుని పసుపు రూపం చేసి పూజ చేయడం ఆయనని స్మరించడం సంప్రదాయం. కానీ వినాయకునికే పూజ జరిపేటపుడు మళ్ళీ మరో వినాయకమూర్తిని పసుపుతో ఏర్పరచి, పూజ జరపడం మూఢమైన ఆచారం. కానీ ఇది వినాయక వ్రతకల్పం లో అలవాటుగా చేరిపోయిన అనవసరమైన ఉపాంగం. మన సంస్కృతిలో చేరిన ఈ విధమైన అనవసరమైన, అర్ధరహితమైన కర్మలని శాస్త్ర అవగాహనతో దూరం చేయవచ్చు..
అందరికి వినాయక చవితి శుభా కాంక్షలు ......

అమలిన శృంగారమే ముఖ్యం...ఇస్లాం

2011-08-31T09:12:00.010+05:30

ఖుత్బా అంటే ఏమిటో గత టపాలో తెలుసుకున్నాం.. వివాహ సందర్భంలో పఠించబడే
అరబ్బీ ప్రసంగాన్ని ఖుత్బా అంటారు.
ఖుత్బా ప్రారంభంలో పఠించబడే తొలి వాక్యానికి అర్ధం ఇది.
స్తోత్రం: కృతజ్ఞతాభావం అల్లాహ్ కొరకే. మనమందరం ఆయనకే కృతజ్ఞులం. ఆయన్నే కీర్తిస్తూ ఉంటాము. ఆయన్నే సహాయం కొరకు అర్థిస్తాము. మన అపరాధాల మన్నింపుకై ఆయన్నే వేడుకుంటాము. మన ఆంతర్యంలో పుట్టే చెడుగు నుండి, మన్ చేష్టల దుష్పరిణామం నుండి మేము ఆయన రక్షణనే కోరుకుంటున్నాము. అల్లాహ్ మార్గం చూపిన వాడికిఎవ్వరూ మార్గం తప్పించలేరు. మరెవరికయితే మార్గం తప్పడానికి అల్లాహ్ వదిలేస్తాడో అతన్ని మరెవ్వరూ మార్గం చూపలేరు.
ప్రసంగంలోని ఈ తొలి వాక్యంలో దైవం పట్ల మనిషి ఎంత కృతజ్ఞతతో ఉండాలో అర్ధమవుతుంది. దైవాన్ని విశ్వసించే వ్యక్తి ఆలోచనా తీరు ఎలా ఉండాలో ప్రస్ఫుటమవుతుంది. మనకి లభించే అసంఖ్యాక వరప్రసాదాలన్నీ దైవం ప్రసాదించినవే అని చెపుతుంది. ఊహ కందని వరప్రసాదాలని దైవం మనిషికి ప్రసాదిస్తాడు. అందువల్ల మనిషి ఆయనకి అత్యంత కృతజ్ఞతాపరుడయి జీవించాలి. ఆయన ఆదేశాలను తు.చ తప్పకుండా పాటించడమే మనిషికి దైవం పట్ల ఉన్న కృతజ్ఞతా భావానికి నిదర్శనం.
మనిషి ఆలోచన, ఆచరణా పరిధుల్లో ఉన్న స్వేఛ్చ కారణంగా అతడు తప్పులు చెయ్యడం, అపరాధాలు చెయ్యడం సాధ్యమే. అందువల్ల వాటికి క్షమాభిక్ష పెట్టమని మనిషి ఆ ప్రభువునే అర్ధించాలి. ఆయన గొప్ప క్షమాగుణం కలవాడు. అలాంటి తప్పులని మరల చేయకుండా జాగ్రత్త పడేందుకు మనస్ఫూర్తిగా సంకల్పం చేసుకునేవాణ్ణి అతడు చేసిన తప్పులని అల్లాహ్ మన్నిస్తాడు. మనిషికి ఇటువంటి అవకాశం ప్రతినిత్యం ఉంటుంది. దేన్నే " తౌబా " (పశ్చాత్తాపం) అని అంటారు.
మనిషి మానసికంగా బలహీనుడన్నది మనందరికి తెలిసిన విషయమే. అతడు మాటిమాటికీ పొరపాట్లు చెయ్యడం సాధ్యమే. మనసు పరి పరి విధాల పెడ మార్గాలకు పోనివ్వకుండా కాపాడడం ఆ ప్రభువుకే సాధ్యం. చెడుగు నుండి కాపాడమని ఈ సందర్భంగా దంపతులు ఆ ప్రభువునే ఆశ్రయించాలి. ప్రభువు సన్మార్గాన్ని సూచిస్తాడు. ఆ సన్మార్గాన్ని మనిషి విడవకుండా పాటించాలి. సన్మార్గం పట్ల గట్టి విశ్వాశంతో దంపతులు మెలగాలి.

ఖుత్బాలో పఠించే రెండవ వాక్యానికి అర్ధం మరో టపాలో...

కొసమెరుపు :
వివాహంలో శృంగారానికే పెద్దపీట ...
ఇస్లాం లో దాంపత్యబంధం అలౌకిక ప్రేమకు, అన్నోన్యతకి పరిమితం కాదు. అలాగని ప్రత్యుత్పత్తి కోసం కూడా కాదు. నిజానికి " నిఖా " అనే పదానికి అర్ధం శృంగారం. నమ్మలేకపోతున్నాం కదూ. వివాహానికి పరమావధి శృంగారమయినపుడు మరిన్ని విశృతమైన నియమ నిభంధనలెందుకు ? ఇంత తతంగమెందుకు ? అని సందేహం రావచ్చు. ఎందుకంటే ఇస్లాం స్త్రీ, పురుష శృంగార వాంఛల గురించి పూర్తి అవగాహన తో జీవితంలో దాని అవసరం గుర్తించింది. మతం మాటున కోరికల అణచివేత ఎంతమాత్రమూ తగదని ఇస్లాం చెపుతుంది.

పవిత్ర గ్రంధం ఖురాన్ శృంగారాన్ని ఈ విధంగా సమర్ధించింది.

" అల్లాహ ఆజ్ఞాపించారు...వారు ( స్త్రీలు )
ఋతు స్రావం అయిన తరువాత శుభ్రపరచుకుని భర్తలతోశృంగారంలో విధిగా పాల్గొనవలెను. ( సురాహ్ బఖరాహ్ 2.222 )

మహా ప్రవక్త మహమ్మద్ (సల్లల్లాహు అలైహి వ సల్లం ఇకముందు స అ సం ) కూడా ఈ విధంగా అంటారు. " యువతీ యువకులారా మీరు వివాహం చేసుకోవాలి. మీ కోరికలను చట్టబధ్ధంగా నెరవేర్చుకోవాలి.
పవిత్ర రంజాన్ సందర్భంగా ముస్లిం సోదరులకు శుభాకాంక్షలతో...
సశేషం

క్రిష్ణం వందే జగద్గురుం

2011-08-22T12:23:00.002+05:30

ఇదేంటి ఉగాది నాడు అదృశ్యమై మళ్ళీ క్రిష్ణాష్టమి నాడు ప్రత్యక్షమయ్యానని అనుకుంటున్నారా ? మరేంలేదండి ఇంటి నిర్మాణ పనుల్లో కొంచెం బిజీ అయి బ్లాగుని నెగ్లెక్ట్ చేసాను. ఈ రోజు నుండి పున ప్రవేశమ్ గావిస్తున్నాను.
బ్లాగు మిత్రులందరికీ క్రిష్ణాష్టమి శుభాకాంక్షలు..

ఇల కోయిల

2011-04-04T19:32:00.003+05:30

ఎలా తెలిసిందో ఎవరు పిలిచారో

మంచుతెర తొలగిందని....

మావిచిగురు తొడిగిందని...

మత్తుకాకుల మధ్య
మత్తకోయిలలు వచ్చి వాలాయి...
వికృతి విలయతాండవ ప్రకృతిలో
శుభకర కరములు చాచి
స్వాగతిస్తోంది శ్రీఖర ఉగాదిని
ఇల కోయిల ఆశావాది

బ్లాగు మిత్రులు, శ్రేయోభిలాషులందరికి ఉగాది శుభాకాంక్షలు

అంతే కాదు ఈ రోజు అంతర్జాతీయ బాలల పుస్తక దినోత్సవం. మీ ఇంట్లో చిన్న పిల్లలుంటే ...
A must read book

HEIDI
Writer: Johanna Spyri
Publisher : Penguin popular classics
చదివించండి లేదా చదివి వినిపించండి. దాని లంకె ఇక్కడ
http://www.gutenberg.org/ebooks/1448

మా పసలపూడి లో పస ఎంత ?

2011-01-21T20:39:00.002+05:30

ఎన్నాళ్ళనుండో ఊరించి, ఊరించి మా టీవిలో మొదలయిన వంశీ మా పసలపూడి కధలు వంశీ డైరెక్షను మార్కు అంచనాలను తారుమారు చేసిందనిపించింది. ఇన్నాళ్ళనుండి చూడడం వీలు పడలేదు. ఈ రోజే గుర్తుపెట్టుకుని మరీ చూసాను. నేను వంశీ పుస్తకం చదవలేదు..కానీ కధల చిత్రీకరణ బాగాలేదనిపించింది. ఏదో డబ్బింగ్ సీరియల్ చూస్తున్నట్టనిపించింది. ఎందుకంటే యాక్టర్స్ వారి డైలాగులు చెప్పేవిధానంలో పెదాల కదలికకీ, పదాల ఉఛ్చారణకీ పొందిక లేకుండా పోయింది. ఎడిటింగ్ లో మరింత శ్రధ్ధ తీసుకోవాలి.
అంతేకాదు...తూ.గో.జిల్లా యాస నటులకు అంతగా వచ్చినట్లు లేదు. ఏదో బలవంతంగా డైలాగులు చెపుతున్నట్లనిపించింది. తూ.గో మాండలీకం తెచ్చిపెట్టుకున్నట్లుగా ఉంది. ముఖ్యంగా సుంకి పాత్ర.. ఈమె నటిస్తున్నట్లుగానే అనిపించింది. పాత్రను ఆకళింపు చేసుకోనట్లు, పాత్ర పట్ల అవగాహన లేనట్లుగా నటిస్తుంది. తూ.గో.జిల్లా నేపధ్యం ఉన్న నటులను ఎంపిక చేసినట్లు లేదు.
రెడ్డి గారి అమ్మాయి పాత్ర లో నటి చెప్పే డైలాగు కి చేసే అభినయానికి పొంతన లేదు. బహుసా నూతన నటీనటులకు నటనలో శిక్షణ కొరవడిందనిపిస్తుంది.
కానీ ఈ ఎపిసోడ్ లో సందేశం మాత్రం బాగుంది. కోనసీమ అందాలు అద్భుతంగా ఉన్నాయి

ఖుత్బా...అంటే

2011-01-12T21:31:00.004+05:30

గత సంవత్సరం నా బ్లాగులో పెళ్ళి పుస్తకం వర్గంలో హిందూ వివాహాలలోని ఆచార వ్యవహారాలను అందించడం జరిగింది. ఎంతోమంది వాటి గురించి తెలుసుకుని కామెంట్ల ద్వారా నన్ను ప్రోత్సహించడం నాకెంతో ఆనందాన్నిచ్చింది.

కొంతమంది వేరే మతాలలోని వివాహ వ్యవస్థ, ఆచార వ్యవహారాలను తెలియచేయమని అన్నారు. నిజమే ఇది ఇంట్రస్టింగా అనిపించింది. అప్పటినుండి ఆయా మతాల వివాహ వ్యవస్థ గురించి అధ్యయనం మొదలు పెట్టాను. వాస్తవానికి హిందూ మతంలో వివాహ వ్యవస్థ గురించి కుప్పలు తెప్పలుగా సమాచారం ఉంది. కాని ముస్లిం, క్రిస్టియన్ వివాహ వ్యవస్థ గురించి సమాచారం తెలుగులో అంతగా అందుబాటులో లేవు. ఆయా మత పెద్దలను సంప్రదించినా అంతగా ఫలితం లేకపోయింది. విషయసేకరణ కొంత కష్టమయింది. కొంతవరకూ క్రైస్తవ వివాహంలోని విషయాలు సేకరించగలిగాను కాని ముస్లిం వివాహవ్యవస్థలోని వ్యవహారమంతా అరబ్బీలోనే ఉంది. దీనిని అవసరమైనంత మేరకు తర్జుమా చేయించుకుని అర్ధాన్ని గ్రహించగలిగాను.

ఏ మతమైనా కోరేదేమిటి ? మనిషి ఇహపర జీవితాలు సుఖవంతం, శాంతిమయం, ఫలప్రదం కావాలంటే మనిషి తన ప్రాపంచిక జీవితం మొత్తాన దైవం కోరేవిధానాన్ని అనుసరించాలి. దైవాదేశాలను కేవలం ఆరాధానాలయాల నాలుగు గోడల మధ్యనే కాక సకల జీవన రంగాల్లో పాటించడం తప్పనిసరి.

ప్రతి మనిషి జీవితంలో వివాహం ఒక గొప్ప మలుపు. ఇదొక పవిత్రకార్యంగా భావిస్తారు. భగవంతుడు మానవ జాతికి మాత్రమే ప్రసాదించిన అనేక ప్రత్యేకతలలో వివాహం ఒకటి. జాతి, మతం, కులం అనే తేడా లేకుండా ఈ కార్యాన్ని ఎవరి స్థోమతని బట్టి వారు వైభవంగా జరుపుకుంటారు. చిన్న, పెద్ద, పేద, గొప్ప అనే బేధభావం లేకుండా బంధుమిత్రుల సపరివారంతో ఎంతో సందడిగా ఈ కార్యాన్ని జరుపుకుంటారు.

ఇక ముస్లిం వివాహ వ్యవహారాలు ఎలా జరుగుతాయో చూద్దాం.
ముస్లిముల జీవితం ఏ విధంగా ఇస్లామీయ జీవన వ్యవస్థకు దూరమయిపోయి ముస్లిం సమాజమే నిర్వీర్యమయి పోతుందో అదే విధంగా ముస్లిముల వివాహాది శుభకార్యాలు కూడా ఇస్లామ్ నిజ జీవితాన్ని ప్రతిబింబించడంలేదనిపించింది.

ముస్లిముల వివాహాన్ని నికాహ్ (ఉర్దూలో) అంటారు. నికాహ్ వధువు లేదా వరుడు ఇంటివద్దగాని జరుపుకుంటారు. నికాహ్ స్థల నిర్ణయం ప్రాధమికంగా వసతి సౌకర్యాల మీద ఆధార పడి ఉంటుంది. అందుకే వీరి వివాహాలు ఈ మధ్య కల్యాణ మండపాలలో కూడా జరుగుతున్నాయి.

నికాహ్ సందర్భంలో పఠించబడే అరబ్బీ ప్రసంగాన్ని సాధారణంగా ఖుత్బా అనంటారు. ఈ ఖుత్బానే మహాప్రవక్త మహమ్మద్ పెళ్ళిళ్ళలో పఠించేవారు. ఇప్పటికీ కూడా నికాహ్ జరిగినప్పుడల్లా ఈ ఖుత్బానే పఠిస్తారు.

నికాహ్ ఓ సంతోష కార్యం. మనిషి సాధారణంగా ఇలాంటి సందర్భాలలో తన్మయత్వంలో తన నిజ స్థానాన్ని విస్మరించే అవకాశం ఉంటుంది. ఈ సమయంలోనే సైతాన్ (మనిషిలోని చెడు గుణం) తన పని నెగ్గించుకునేందుకు మంచి తరుణం. ఇది మంచి పై చెడు విజయం. అందువల్లనే మహాప్రవక్త ఆచరణాత్మకంగా బోధించిన వివాహ ప్రసంగం ఎంతో శుభప్రదమయింది. అది మహా వరప్రసాదమని చెప్పవచ్చు. ఇందులో ఇహపర జీవితాలకు సంబంధించిన అసంఖ్యాకమయిన మేళ్ళు ఉన్నాయి.
వాస్తవానికి ఈ ప్రసంగాన్ని అర్ధంచేసుకోకుండా, ఓ ఆచారంగానో, లాంఛనంగానో భావిస్తున్నారు. మన జీవితాల్లో దాని భావాన్ని, ఉద్దేశాన్ని ఇనుమడింపచేసుకునే అవకాశం కనిపించుటలేదు.
మహాప్రవక్త ప్రవచించిన ఆ ప్రసంగ సారాంశాన్ని తరువాత టపాలో తెలుసుకుందాం. ..............సశేషం

మరో మొగ్గ...

2011-01-01T23:01:00.005+05:30

కాలం ఎంత విచిత్రమైంది. వెయిట్ చేస్తే భారంగా కదులుతున్నట్లనిపిస్తుంది.
కష్టకాలమయితే ఎడారి ఎంతకీ తరగదనిపిస్తుంది.
సౌఖ్యంగా ఉంటే వేలి సందుల్లోంచి అపుడే జారి పోయిందే అనిపిస్తుంది.
నిన్న మొన్ననే మనం 2000 సం.రం లోకి అడుగు పెట్టామా అనిపించింది..
ఇంతలోనే ఈ దశాబ్దం ముగిసిపోయింది.

మొగ్గలా మరో సంవత్సరం

పువ్వులా వికసించి

పరిమళాన్ని మోసుకొస్తుంది

కనిపించని ముళ్ళతో

కాటు వేస్తుంది..

అంతలోనే వాడిపోయి

మరో మొగ్గకు జీవం పోస్తుంది....

బ్లాగు మిత్రులందరికి
నూతన సం వత్సర శుభాకాంక్షలు....

ఈ కధకి పేరు పెట్టండి..

2010-10-09T08:02:00.005+05:30

నగరాన్ని పిండితే రాలినట్లు రోడ్లన్నీ జనమయం. ఎవరి బిజీ లోవాళ్ళు. ఆఫీసులకెళ్ళే వాళ్ళు. పిల్లలని స్కూలుకి, కాలేజీలకి తీసుకుని వెళ్ళేవాళ్ళు, రోడ్లు క్రాస్ చేయడానికి ప్రయత్నిస్తూన్నవాళ్ళు కొబ్బరి బొండాలు, కూరగాయలు, చేపలు, రొయ్యలు అమ్మేవాళ్ళు ఎవరి అవసరాల్లోవారు. రావాల్సిన బస్సు కోసం అసహనంగా అటూ, ఇటూ చూస్తూంది కాజల్. ఎదురుచూసే బస్సు రాకుండా ఎక్కడికి పోతుంది. బస్సు వచ్చేవైపే కాదు, రాని వైపుకూడా చూడటం ఆరాటానికి పరాకాష్ట. అయితే రావాల్సిన బస్సు కంటే వేగంగా ఆమె ఆలోచనలు పరిగెడుతున్నాయి. సరిగ్గా నిన్న ఇదే సమయానికి జరిగిన సంఘటన తన కళ్ళముందు కదలాడింది. .

నిన్న బస్సు కోసం ఎదురు చూస్తూన్నపుడు ఎవరో ఒక ఇరవై, ఇరవైఐదు సంవత్సరాల యువకుడు రోడ్డు క్రాస్ చేస్తూ బైక్ గుద్ది పడిపోయాడు. అందరూ అతన్ని ముందు తిట్టినా తరువాత అతడు గుడ్డివాడని తెలిసి జాలిపడి బైక్ అతన్ని తిట్టారు.

తనకేమీ పట్టనట్లు అతను నవ్వుకుంటూ తను వెయిట్ చేస్తున్న బస్టాప్ దగ్గరకి వచ్చేడు. నెమ్మదిగా నడుచుకుంటూ తనకు దగ్గరగా వచ్చి... ఏవండీ 28 వచ్చిందాండి. అందం, ఆకర్షణ అన్నీ ఉన్న ఇతనికి దేవుడు అన్యాయం చేసాడనిపించింది. ఏవండీ మిమ్మల్నే... ఉలిక్కి పడింది కాజల్...ఇంకా రాలేదండి. నేనూ దానికోసమే వెయిట్ చేస్తున్నాను. రాంగానే మిమ్మల్ని ఎక్కిస్తాను. చాలా ధాక్సండి.. మీకెందుకండి శ్రమ ..నేనెక్కగలను. బస్సు వచ్చినపుడు చెప్పండి చాలు. మీరేమనుకోనంటే ఒక చిన్న మాట..మాలాటి వికలాంగుల మీద సానుభూతి చూపించండం నాకిష్టం ఉండదండి. అది మా ఆత్మవిశ్వాసాన్ని దిగజార్చుతుందని నా భావన. వీలయినంత వరకూ ఎవరి మీద ఆధార పడకుండా మా పనులు మేము చేసుకోవడంలోనే మాకు తృప్తి ఉంటుందండి.

ఐయామ్ సారి నా గురించి చెప్పనేలేదు కదూ. నా పేరు ఉదయ్. అనాధాశ్రమంలో జీవన ప్రస్థానం మొదలైంది. రైల్వే న్యూకాలనీలో ఉన్న బ్లైండ్ స్కూల్లో టీచర్ గా వర్క్ చేస్తున్నాను...మీరు ఏ కాలేజిలొ చదువుతున్నారు. మీరు కాలేజి చదువుతున్నట్లు ఎలా తెలిసిందని అవాక్కయ్యారా ? ఇందులో విచిత్ర మేముందండి. మీరు వాడే పెర్ఫ్యూమ్ కాలేజ్ స్టూడెంట్స్ తప్ప మరెవరూ వాడరు కదా. తను నిజంగానే అవాక్కయింది. నోటమాట రాలేదు. మాట్లాడే అవకాశము రాలేదు. తన నిశ్శబ్దాన్ని ఛేధిస్తూ 28 బస్సు హారన్ మ్రోగింది. చూస్తుండగానే అతను బస్సు ఎక్కడం, తరువాత హడావుడిగా తను ఎక్కడం జరిగిపోయింది. బస్సులో విడివిడిగా కూర్చున్నా ఒకరు మరొకరి గురించి ఆలోచిస్తూనే ఉన్నారు. ఆలోచనలో ఉండగానే అతని బస్టాప్ వచ్చింది. తను దిగిపోయాడు.

బస్సు కదిలింది. వెంటనే తను సీట్లోంచి లేచి అంకుల్ కొంచెం స్లో చేయరా నేనిక్కడే దిగాలి. స్టాప్ లో దిగాలమ్మా, ఎక్కడపడితే అక్కడ బస్సాపరు అంటూనే బస్సు స్లో చేసాడు. దిగి వెనక్కి చూసింది. చాలా దూరంలో ఉన్నాడు. మళ్ళీ ఆలోచనలు..... తను దిగాల్సింది మరో రెండు స్టాపుల తర్వాత. మరి ఇక్కడ ఎందుకు దిగింది. అతని గురించా ? అతనితో ఏం మాట్లాడుతుంది తనకే తెలియదు. సెల్ తీసుకుని మాధవికి ఫోన్ చేసి అటెండెంస్ మేనేజ్ చేయమని చెప్పింది. ఇపుడేం చేయాలి. వెనక్కి చూసింది. అతనెవరితోనో మాట్లాడుతూ నెమ్మదిగా నడుచుకుంటూ వస్తున్నాడు. తను నడక మొదలు పెట్టింది. దగ్గర కొచ్చేకా...అరె మీరా... మీరిక్కడే దిగారా ? కాలేజ్ కి వెళ్ళలేదాండి.

లేదండి..ఇక్కడ ఒక అంకుల్ వాళ్ళింటికి వెళ్ళాలి. ఆ పని అయిపోయాకా కాలేజికి వెళతాను. తనకి తెలుసు అది అబధ్ధం అని....బహుసా అతనికి కూడా.. అయినా ఎందుకు చెపుతున్నట్లు.. ఆతన్ని చూడంగానే పరిచయం పెంచుకోవాలని ఎందుకనిపించింది. అదీ తెలియదు. ఇరువురు పరిచయాలు చేసుకోంగానే అతని స్కూలు వచ్చేసింది.

బస్సు హారన్ మ్రోగేసరికి ఊహల్లోంచి బయట పడింది. కొంచెం దూరంలో ఉదయ్ ఉన్నాడు. తనొచ్చేవరకూ బస్సు ఆపింది. రోజు ఇలాగే కలుసుకోవడంలో వారి అనుబంధం పెరిగింది.
తను కూడా అనాధే. చిన్నప్పటి నుండి ఒక దాత చదివించాడు. అతను కాస్తా మరణించేసరికి ఆమె చదువు మధ్యలోనే ఆగిపోయింది. వర్కింగ్ విమెన్ హాస్టల్ లో ఉంటూ ఏదో చిన్న షాపులో పార్టైమ్ స్టోర్స్ మేనేజర్ గా పనిచేసుకుంటూ చదువు కుంటుంది.

ఇద్దరికీ కులం, మతం అడ్డుగోడలు లేవు. తల్లి దండ్రుల ఆంక్షలు లేవు. సో... వారి ప్రేమకి ఎల్లలు లేవు. అలాగని ఎవరూ హద్దులు దాటలేదు.

తరచూ పార్కుల్లోనూ బీచ్ ల్లోనూ కలుసుకోవడం వారిని వివాహ బంధానికి దారి తీసింది.
ఒక రోజు....నాకు కళ్ళు వచ్చే అవకాశాలున్నాయని డాక్టర్లు చెప్పారు. నేత్రదాతలకోసం వెతుకుతున్నాను. నాకు చూపు రాగానే మనిద్దరం పెళ్ళి చేసుకుందాం అన్నాడు.

ఆ రోజు రాత్రి కాజల్ కి నిద్రపట్టలేదు. ఎలాగైనా అతనికి చూపు రప్పించాలి. రెండు రోజులు అతన్ని కలవలేదు. ఫోన్ చేసినా స్విచ్ ఆఫ్ చేసింది. అతని రిపోర్ట్స్ చేతబట్టుకుని నగరంలో ఉన్న కంటి హాస్పటల్స్ చుట్టూ తిరిగింది. మొత్తానికి శంకర్ ఫౌండేషన్ హాస్పటల్ లో అపాయింట్ మెంట్ సాధించింది.

మరో పది రోజుల్లో అతనికి ఆపరేషన్. ఈ విషయం అతనికి చెప్పింది.
తన చీకటి తెరలు తొలగిపోయే రోజుకోసం ఇద్దరూ ఉత్కంఠతో ఎదురుచూసారు.
కళ్ళు వస్తే ఈ లోకంలోని రంగులన్నీ తెలుస్తాయి.
ప్రకృతిలోని అందాలన్నీ చూడగలుగుతాడు. ఆ ఊహే అతణ్ణి ఉద్వేగపరచింది.
ఆపరేషన్ అవ్వంగానే కళ్ళు తెరచి మొదట తననే చూడాలని అన్నాడు.
ఆపరేషన్ అయ్యింది.
తను కళ్ళు తెరిచేసరికి ఎదురుగా తన రూపం.. మసక మసకగా క్రమంగా రూపుదిద్దుకుంది.

అతని మనో నేత్రంలో ఆమె రూపం సజీవంగా..... ఎదురుగా.....
పెళ్ళి గురించి అడిగింది..చూద్దాంలే..అప్పుడేనా...తర్వాత మాట్లాడుకుందాం...
డిస్చార్జ్ రోజున అడిగింది...ఆలోచిస్తాన్లే అన్నాడు....
అతనికి దగ్గరగా వచ్చింది.. కళ్ళని ముద్దాడింది....
నా కళ్ళు జాగ్రత్త......అని వెళిపోయింది.....

నగరాన్ని పిండితే రాలినట్లు రోడ్లన్నీ జనమయం. ఎవరి బిజీ లోవాళ్ళు. ఆఫీసులకెళ్ళే వాళ్ళు. పిల్లలని స్కూలుకి, కాలేజీలకి తీసుకుని వెళ్ళేవాళ్ళు, రోడ్లు క్రాస్ చేయడానికి ప్రయత్నిస్తూన్నవాళ్ళు కొబ్బరి బొండాలు, కూరగాయలు, చేపలు, రొయ్యలు అమ్మేవాళ్ళు ఎవరి అవసరాల్లోవారు.

కళ్ళ చుట్టూ ఉండాల్సిన కాటుక (కాజల్) చీకటిని కళ్ళల్లో నింపుకుని....
రావాల్సిన బస్సు కోసం అసహనంగా ఎటో చూస్తూంది కాజల్....

(అ)విశ్రాంత జీవనయానం.....

2010-10-01T04:58:00.006+05:30

నిన్న మాస్కూల్లో ఒక టీచర్ రిటైర్ అయ్యారు..తన విశ్రాంతజీవనం మీద ఒక కవిత వ్రాయమని అడిగారు... ఆమె నార్తిండియన్. హిందీ టీచర్. హిందీ లేదా ఇంగ్లీషులో వ్రాస్తానంటే కాదు తెలుగులోనే వ్రాయమన్నారు. ఆ సందర్భంలో ఆమె తరపున నే చదివిన కవిత...

ఈరోజు గంట కొట్టంగానే నాకంటే ముందే
బడి లోకి వెళ్ళాలని ననుతోసుకుంటూ
వెళ్ళిన నా చిన్నారులు
నా స్మృతి వీధుల్లోంచి వెనక్కి వెళిపోతుంటారు...
నా మనో సముద్రంలో ఎగిసిపడిన అలల్ని
ఒకటొకటిగా మోసి నా చేతిలో
విరిగి అరిగిన సుద్దముక్క
విశ్రాంత జీవన కౌగిలిలో కరిగిపోతూంటుంది...
తనువు తారు నలుపైనా
గోడ నిండా పరుచుకుని
అక్షర మల్లియల సుగంధాన్ని
ఎదజల్లిన నల్లబల్ల నాకోసం
తనువంతా కనులై ఎదురుచూస్తూంటుంది...
ఈ దేవాలయ ప్రాంగణంలో
నా పాద ధూళి రేపటి వానలో
తడిసి ముద్దయిపోతుంది...
హాజరు పుస్తకంలో నా చివరి సంతకం
వేల వేల ప్రశ్నల్ని ప్రసవిస్తుంది...
నే కూర్చునే కుర్చీ మీ వైపు
జాలిగా చూస్తూంటుంది.
మీ చెక్కిళ్ళపై ఎండిన కన్నీళ్ళలో
నా రూపం క్రమక్రమంగా కరిగి పోతుంది...
నేను మాత్రం.....
గుప్పెడు జ్ఞాపకాల మూటని
భుజాన్న మోసుకుని వెళిపోతాను..
మధురక్షణాల చిత్తరువులు(ఫోటోలు)
తగిలించిన గోడకి నా రెండు కళ్ళూ ఉరి పోసుకుంటాను..
వీధివెంట వెళ్ళే బడి పిల్లలని చూస్తూ
గుమ్మానికి వేలాడతాను..
విశ్రాంత జీవన యానంలో
మహాప్రస్థానానికి దారి వెతుకుతూంటాను.
మిత్రులారా ఇక సెలవ్......

అమర శేఖరుడు

2010-09-02T20:57:00.006+05:30

ఆయన మనకిక లేరు..అను భావన మన మస్థిష్కాలలో ఇంకా ముద్ర పడకుండానే సంవత్సరం గడిచిపోయింది. బహుసా ఇది అసాధ్యమేనేమో..ఎందుకంటే ఆయనను ఎలా మర్చి పోగలం. అఖిలాంధ్ర ప్రజల హృదయాల్లో గూడుకట్టుకున్న ఆయన మనకిక లేరనేది ఒక తీపి అబధ్ధం. నిజానికి మరణం మనుషుల్ని దూరం చేసినా మనసుల్ని దగ్గర చేస్తుంది.
గత సం వత్సరం ఆయన తిరిగిరాని లోకాలకు తరలి వెళ్ళిన సందర్భం లో నా బ్లాగులో పోస్టు పునర్ముద్రిస్తున్నాను...
రోజూ కనిపించే
మీరు......
సమాధిలోకి వెల్తున్నపుడు
మీచుట్టూ ఎవరూ ఉండరు
ఎవరూ ఏడ్చినట్లనిపించదు
ఏ ప్రార్ధనలు మీకు వినబడవు
ఎన్నో ప్రశ్నలు మాత్రం
మీ చుట్టూ నాట్యం చేస్తూంటాయి
మీ పార్ధివ శరీరం బూడిదయి పోతూంటే
మీకేమీ బాధనిపించదు...
రెండోరోజుకల్లా మీ ఫోటో
చిరునవ్వుతో మిమ్మల్ని పలకరిస్తుంది...
మీకందరూ కనిపిస్తారు
మీరెవరికీ కనపడరు...
పరామర్శల ముసుగేసుకుని
వచ్చేవారందరూ
ఫోటో ఫ్రేములో బిగించిన
మిమ్మల్నిచూస్తూంటారు
అశ్రునయనాలతో
మీ పిల్లలు మిమ్మల్ని చూస్తూ
వెళిపోతూంటారు...
ఎవరి బిజీ వారిది
మీరేమీ బాధపడినట్లుండరు...
పెరట్లో మీరు నాటిన మొక్కలు
అందమయిన పూలు పూస్తూంటాయి
పిల్లలు వాటినేచూస్తూ
ఆనందపడుతూంటారు
మీకేమీ బాధనిపించదు...
ముసలి చెట్ల స్థానంలో
కొత్త మొక్కలు మొలుస్తూంటాయి
ఈరోజెందుకో
మీరు బాధగా కనిపిస్తున్నారు
పాతసామాన్ల వాడి సంచిలో
ఇరుక్కుపోయిన మీ ఫొటో
మిమ్మల్ని చూసి జాలిపడుతూంటుంది....

పెళ్ళి పుస్తకం. 15

2010-08-01T22:17:00.003+05:30

హిందూ వివాహ ధర్మం మీద గత కొన్ని సమ్వత్సరాలుగా చేసిన అధ్యయనం వలన ఎన్నో విషయాలు తెలిసినవి. అనేక సందర్భాలలో ఈ విషయాలను బంధుమిత్రులతో పంచుకున్నపుడు వారికెంతో ఆశక్తిని కలిగించేవి. చాలామంది మిత్రులు వీటిని పుస్తక రూపమ్లో తీసుకురమ్మని పలు విధాలుగా ప్రోత్సహించారు. కాని నాకెందుకో ఇష్టం కలగలేదు. ముద్రణకి మనసంగీకరించలేదు. ప్రత్యేకమైన కారణమేమి లేదు. అయినా వారి సలహాని త్రోసిపుచ్చలేదు. నే రాసుకున్న నోట్సు, సేకరించిన విషయాలు ఒక క్రమం లో ఉండాలని ఒక చిత్తు ప్రతిని తయారు చేసుకున్నాను. ఇది జరుగుతున్న తరుణమ్లో విదేశాల్లో ఉంటున్న మా అన్నయగారి పాపకి పెళ్ళి కుదిరింది. కాకినాడలో పెళ్ళి . పెళ్ళి పనులు కొన్ని అన్నయ నాకప్పగించాడు. వాటికోసం కాకినాడ, వైజాగ్ తిరుగుతూంటే మా బంధువుల్లో ఒక పెద్దాయన " అవున్రా చిట్టీ నీ మేనకోడల పెళ్ళి కి ఓ చిన్న పెళ్ళి పుస్తకం అచ్చువేయించి అందరకీ పంచవచ్చుకదా " అని సలహా ఇచ్చాడు. ఎందుకో ఆ ఐడియా అద్భుతంగా అనిపించింది. వెంటనే ప్రెస్ వాళ్ళని సంప్రదించి రెం డువేల కాపీలు (జేబులో పెట్టుకునే సైజులో) ముద్రించి పెళ్ళిలో అందరికీ పంచిపెట్టాను.కొన్ని తెలిసినవారికి, మా స్కూలు పేరెంట్స్ కిపంచిపెట్టాను. అందరూ ఎంతో మెచ్చుకున్నారు. ఇది జరిగి మూడు సంవత్సరాలు పైనే అయింది. నాకు తెలియని వాళ్ళు కూడా నాకు ఫోను చేసి మరీ అభినందనలు తెలిపారు. (వాళ్ళకి నా పుస్తకం ఎలా చేరిందో నాకు తెలియదు) అయినా నాకెందుకో తృప్తి కలగలేదు. ఏదో వెలితిగానే ఉండేది. ఇదుగో ఆ సందర్భం లో నా ఫ్రెండ్ మాలతి ఇవన్నీ బ్లాగులో పెట్టమని సలహా ఇచ్చింది. సో అలా గత సంవత్సరం అక్టోబరు నెలలో మొదలయిన ' నా భావనలు ' బ్లాగులో ' పెళ్ళి పుస్తకం ' అనే పేరుతో ఒక వర్గాన్ని మొదలుపెట్టాను. ప్రపంచం నలుమూలలనుండి ఎంతో మంది తెలుగు బ్లాగర్లు అభినందించారు, ఆశీర్వదించారు... అందరికీ పేరు పేరున నెనర్లు. కొందరైతే క్రిస్టియన్, ముస్లిం మత వివాహ ధర్మాలనికూడా వ్రాయమని అడిగారు. ఇది అంతర్లీనంగా నా బాధ్యతని పెంచింది. అంతకంటే ఎక్కువగా వారి సలహా నన్ను ప్రేరేపించింది. అందుకే ఇతర మతాలలో జరిగే వివాహ తంతులగురించి అధ్యయనం మొదలు పెట్టాను. ఈ రెండు నెలల అధ్యయనంలో ఎన్నో ఆశక్తికరమైన విషయాలు తెలిసాయి. అవన్నీత్వరలో మీతో పంచుకుంటాను.

మతమేదయినా వివాహ ధర్మమొకటే ' సహజీవన సౌందర్యం ' . పాశ్చాత్య నాగరికతా మోజులో పడి భారత యువత ఎంతగా భ్ర ష్టుపట్టిపోతుందో మనకి తెలియంది కాదు. ప్రేమ పేరుతో వంచనలు, దురాగతాలు అంతు లేకుండా పోతున్నాయి. భాధ్యతగల్లిన పౌరులే కాదు సమాజంలో హోదా,పరువు వున్నవారు కూడా ఈనాడు వివాహేతర సంబంధాలతో విచ్చలవిడి శృంగారాన్నిఇపుడు ఒక స్టేటస్ గా భావిస్తున్నారు. సర్వత్రా నైతిక విలువలు లోపిస్తున్నాయి.
యావత్ ప్రపంచం లోనే అత్యధిక యవశక్తి ఉన్నదేశం మన భారతదేశం. యువత సన్మార్గం లో నడుచుకుంటే భారతదేశాన్ని మించిన మరొ దేశం ఈ ప్రపంచం లో ఉండదంటే అతిశయోక్తి కాదు.

సంఘమ్లో సదాచారాలను, సాంఘిక న్యాయాన్ని విశ్వజనీనంగా ఏర్పాటుచేసి సువ్యవస్థను రూపొందిచిన వారు మన పూర్వీకులు. ప్రపంచం లో ఎక్కడా లేని వివాహ సంస్కృతి మనది. భిన్న కుటుంబం లో పుట్టి, భిన్న వాతావరణం లో పెరిగి, భిన్న అలవాట్లను, అభిప్రాయాలను కలిగి ఉన్న ఇద్దరు మనుషులను ఒక పసుపు తాడు ప్రేమానురాగాలతో ఆ జన్మాంతం కట్టిపడేసే పటిష్టమైన వివాహ బంధం మనది. మన పూర్వీకులు మనకందించిన ఈ సంస్కృతీ సంప్రదాయాలను మన ముందుతరాలకు అందిచాల్సిన బాధ్యత మనందరిది.
భారతీయ వివాహ పధ్ధతి యందలి పవిత్రత, గౌరవం , ఆశయం, ఆదర్శం ప్రపంచమందలి మరి ఏ యితర దేశమందుగాని, మతమునందుగాని గాన జాలము. ....అనిబిసెంటు.

పెళ్ళిలో జీలకర్ర, బెల్లం ఎందుకు ?

2010-05-26T05:37:00.006+05:30

వివాహ ప్రక్రియ లోని ముఖ్యమయిన వాటికి వివరణ
పెళ్ళిపుస్తకం..14 వ భాగం.

కాశీకి పోవుట:
బ్రహ్మచారి చదువు ముగిసిన పిమ్మట గురువు ఆజ్ఞగొని యాత్రకు మరలుట (సమావర్తనము) ఒక ఆచారముగా ఉండేది (ఇప్పటికీ కొన్ని వర్ణాలలో ఈ తంతు ను చూడగలం). ఆ యాత్ర ఒక సమ్వత్సరం పరిమితి ఉండేది. ఆ దీక్షలో గురువు శిష్యునకు క్షురకర్మ(గుండు గీయించి) చేయించి, నూతన వస్త్ర ధారణ గావించి తర్వాత గురుదక్షిణ, దానితో ఆవును, దూడను, ఎద్దును స్వీకరించి సమావర్తనము చేయిస్తారు. ఈ సమయమున గొడుగు, చెప్పులు మొదలగు సామాగ్రిని సంసిధ్ధము చేసికొని, గురువునకు ఈ సామాన్లని దానము చేసి, బ్రాహ్మణులను పూజించి ప్రతి లోపమునకు ప్రాయశ్చిత్తముగా వారి అనుగ్రహమును పొంది బయలుదేరవలెను. ఈ తంతునే కాశీకి పోవుట అని క్లుప్తంగా అంటారు. పాద యాత్ర చేస్తున్న స్నాతకుని చేరి కన్యాదాత తన పుత్రికను దానము చేయుదననియు, అగ్నిసాక్షిగా పాణిగ్రహణము చేయుమనియు కోరును. అపుడు స్నాతకుడు కాశీ ప్రయాణము విరమించుకొని కన్యను వివాహ మాడతాడు.

మధుపర్కము :

వరుడు అలంకృతుడై మంగళగీతికలతో, వేదమంత్రములతో చక్కని వాహనమున పెండ్లివారి యింటికి బయలుదేరును. వీరిని ఆహ్వానించి కన్యాదాత మధుపర్కము నొసగును. వరుడు మత్రపూతకముగా మధుపర్కమును స్వీకరించును. మధుపర్కమనగా తీయని పానీయం. మధువు (తేనె)తో పాలు మొదలగు వాటిని కలిపి తయారు చేయుదురు. ఇది సేవించిన తర్వాత వరుని వస్త్రాదులతో సన్మానిస్తారు. ఇది తెలియక మధుపర్కములు అనగా పెళ్ళిలో కట్టుకొను వస్త్రములు అను పొరపాటు అభిప్రాయం నేడు వ్యాపించింది. ఇంకా విచిత్రమేమంటే " జరీ మధుపర్కములు " అను పద ప్రయోగాలు కూడా అజ్ఞానము వలన తయారయినవి.

గౌరీ పూజ లేదా లక్ష్మీపూజ :

వధువు ఈ పూజ చేయుట వలను వధువునకు మాంగల్యాభివృధ్ధి కలుగును.

కన్యాదాత వరుని పూజించుట :

కన్యాదాత వరుని పాదములు కడిగి పూజించును. నిజానికి వరుడు కన్యాదాత కన్నా వయసులో చిన్నవాడు. వయసులో పెద్దవాడు తనకన్న చిన్నవాని పాదములు తాకుట, కడుగుట సామాన్యముగా లోకాచారము కాదుగాని, ఇది వివాహములో ఆచారము. దీనికి కారణము మంత్రములలో చెప్పబడింది. ఇక్కడ వరుడు లక్ష్మీనారాయణ స్వరూపుడు. ఇతడిని పూజించి, కాళ్ళని కడిగి, జలధారతో కన్యను దానమిచ్చుట (కన్య ధారపోయుట) మహాభాగ్యముగా భావించబడును.

జీలకర్ర, బెల్లము :

శుభముహూర్త సమయమున వధూవరుల మధ్య తెరతొలగిస్తారు. ఒకరినొకరు చూసుకున్న తరువాత జీలకర్ర , బెల్లము కలిపిన ముద్దను ఒకరి తలపై ఒకరు నిలిపి చేతితో తాకుతారు. పూర్వకాలములో పదార్ధ విజ్ఞాన శాస్త్రవేత్తలు (Material Scientists) జీలకర్ర బెల్లము కలిపి నూరినా, నలిపినా ధన సంజ్ఞక విద్యుత్తు (Positive electric charge) ఉత్పత్తి అగునని వర్ణించారు. జీలకర్ర బెల్లముతో ఘర్షణ చేస్తే అలాగే జరుగునని నిరూపించ బడింది. వేద కల్పము తెలిసిన పెద్దలు దీనిని గ్రహించి వధూవరుల పరస్పర జీవశక్తుల ఆకర్షణకు తోడ్పడునట్లుగా జీలకర్ర బెల్లము తాకుట ఒక ఆచారముగా చేసారు. దీనివలన దృష్టి కలుపుట, మనస్సు సంకల్పించుట సంభవించునని నమ్మకము.

అరుంధతి దర్శనము :

వివాహ ప్రక్రియలో వధూవరులను అరుంధతీ దర్శనం చేయిస్తారు. అరుంధతి అనగా ఎటువంటి పరిస్థితిలోనూ ధర్మమునకు హాని కలిగింపనిది అని అర్ధం. నూతన దంపతులు కామమునకే ప్రాధాన్యమీయకుండా ధర్మమునకే ప్రాధాన్యమిచ్చి లోకములో ఆదర్శ దంపతులుగా మెలుగుటకు కావలసిన దీవెనలు అరుంధతీ వశిష్టుల దర్శనము
వలన పొందింపచేయటమే మన పెద్దల ఉద్దేశ్యము.
కొసమెరుపు:
ఒక యువతి త్రాచుపాముతో ప్రేమలో పడి పెళ్ళాడిన ఉదంతం 07.06.2006 న రెండువేల మంది సమక్షమ్లో జరిగింది. ఒరిస్సా రాజధానికి దగ్గరలొ అటాలా పల్లెకు చెందిన బింబాలా దాస్(30) అనేయువతి తాను తాచుపాముని ప్రేమిచానని పెళ్ళాడతానని ప్రకటించింది. మూఢనమ్మకాలకు నిలయమైన ఆ గ్రామ ప్రజలు పాము పుట్ట పక్కనే వివాహ వేదిక చేసి
మంత్రోఛ్ఛారణతో తంతు నిర్వహించారు. వరుడు (పాము) పాపం ఎంతకీ పుట్టలోంచి రాకపోవడంతో పాము లోహ ప్రతిమను పెట్టి తంతు కానిచ్చేసారు.

పెళ్ళి పుస్తకం మళ్ళీ తెరవరూ...

2010-05-22T23:54:00.005+05:30

స్కూటీ డిక్కీలో మర్చిపోయిన పుస్తకాలు తెచ్చుకుందామని సెల్లార్ లోకి వెళ్ళాను. ఐదవ ఫ్లోర్ పార్వతి గారు వారి మరిది పెళ్ళి విషయాలు చెపుతుంటే అర గంట ఇట్టే గడిచిపోయింది. స్కూలుం టే అసలు ఖాళీ ఉండదు. ఎవరయినా మాట్లాడితే ముక్తసరిగా మాట్లాడి వచ్చేసిదాన్ని. ఇపుడు సెలవులు కాబట్టి ఎవరయినా మాట్లాడితే కాసేపు వారితో గడిపి మరీ వస్తున్నాను. పిల్లలిద్దరూ మా ఆడపడుచు ఇంటికి వెళ్ళారు. ఇల్లు కొంచెం ప్రశాంతంగా ఉంది. తలుపు తాళం తీసి ఇంట్లో అడుగు పెట్టేసరికి సెల్ మోగుతూంది. గబగబా వెళ్ళి సెల్ అందుకున్నాను. సామంత్ నా స్టూడెంట్
సాయంత్రం తనూ ఇంకా కొంతమంది ఫ్రెండ్స్ ఇంటికి వస్తారంట నేను ఇంట్లో ఉంటానా లేదా అని ఫోన్ చేసాడు. తప్పకుండా రమ్మని చెప్పాను.
సామంత్ చాలా మంచి స్టూడెంట్. కష్టపడి చదువుతాడు. స్కూల్ టాపర్ కూడా. ఒక్క చదువే కాదు. అన్ని పోటీలలోనూ టాపరే. వాళ్ళ ఫాదర్ రియల్ ఎస్టేట్ బిజినెస్. కోటీస్వరుల కుటుంబం. అయినా సామంత్ చాలా వినయంగా ఉంటాడు.
ఇంటర్ కం లో్ వాచ్ మేన్ కి ఫోన్ చేసి వాళ్ళొస్తే పైకి పంపమని చెప్పాను. సాయంత్రం ఐదున్నరయ్యేసరికి కాలింగ్ బెల్ మోగింది. వాళ్ళే వచ్చారనుకుని టి.వి. కట్టేసి తలుపు తెరచి చూస్తే పనిమనిషి నర్సమ్మ. తను పని చేస్తూంటే ఉల్లిపాయలు అవి కోసి వాళ్ళకి పకోడీలు వేద్దామని పిండి కలిపి ఉంచుకున్నాను. నర్సమ్మ వెళ్ళకుండానే సామంత్, ఖదీర్, వినయ్ వచ్చారు.
గుడ్ ఈవినింగ్ మేడం :
గుడ్ ఈవినింగ్ వెల్ కం..రండి కూర్చోండి. నిలబడే ఉన్నారు.
నో..నో ఫార్మాలిటీస్. ఇక్కడ మీరు స్టూడెంట్స్ కాదు.
చెప్పండి. ఏంచేస్తున్నారు. ఏమైనా సమ్మర్ కోర్సులకి అటెండవుతున్నారా ?
నో..మేడం. ఊరికెళ్ళాం మేడం.. సామంత్ అన్నాడు.
ఒ.కె. ఒన్ మినిట్..
కిచెన్ లోకి వెళ్ళి నర్సమ్మకి పకోడీలు వేయమని చెప్పి వచ్చి కూర్చున్నాను.
ముగ్గురు బెస్ట్ ఫ్రెండ్స్ . ముగ్గురూ మూడు మతాలకు చెందిన వారైనా చాలా క్లోజ్ గా ఉంటూ అన్ని పండగలూ సెలబ్రేట్ చేసుకుంటూంటారు.
ఊ. చెప్పండి రేపే కదా రిజల్ట్స్ .
ఔను మేడం టెంషన్ గా ఉంది వినయ్ అన్నాడు.
టెంషన్ దేనికి. మీరు బాగా వ్రాసారు. మార్కులు కూడా బాగా వస్తాయి.
ఏ కాలేజీలో జాయిన్ అవుదామనుకుంటున్నారు?
ఇంకా ఏమి డిసైడ్ చేసుకోలేదు మేడం. డాడీ రిజల్ట్సు వచ్చాకా చూద్దాం అన్నారు.. ఖదీర్ అన్నాడు.
గుడ్ డెసిషన్..
నర్సమ్మ పకోడీలు తెచ్చింది. తీసుకోండి.
ముగ్గురూ మొహమాట పడి పోతున్నారు.
ఇవన్నీ ఎందుకు మేడం. వినయ్
నో..చెప్పానుగా మీరిక్కడ స్టూడెంట్స్ కాదని..తీసుకోండి.
మీ ఫ్రెండ్స్ అందరూ బాగున్నారా?
అందరూ బాగున్నారు..మేడం. సామంత్ కి నా దగ్గర చనువెక్కువ. తనంటే నాకు అభిమానం కూడా.
మేడం మీరేమను కోనంటే ఒక చిన్న రిక్వెస్ట్ మేడం.
చెప్పు సామంత్..
ఏం లేదు మేడం. మీరీమధ్య మీ పెళ్ళి పుస్తకం ఎపిసోడ్స్ ఏమీ పెట్టలేదు.
మా పేరెంట్స్ కూడా నన్నడిగారు.
అదా..మరేమ్లేదు.. నీకు తెలుసుకదా..మీ అంకుల్ ఈ మధ్య చాలా బిజి అయిపోయారు.
ఎక్కువ టూర్స్ కి వెళ్ళాల్సి వస్తూంది.
ఇంటిపని, పిల్లల ఎగ్జాంస్, అంతేకాదు నీకుతెల్సు కదా ఇల్లు కట్టుకుంటున్నాం ..
ఆ పని కూడా నేనే చూసుకోవాల్సివస్తూంది.
వీటన్నిటితో కొంత వీలుపడక పోస్ట్ చేయలేకపోయాను. త్వరలో స్టార్ట్ చేస్తాను.
మేడం. మాక్రైస్తవ మతం లోని వివాహాన్నిగురించి కూడా రాస్తానన్నారు. వినయ్ అన్నాడు.
తప్పకుండా వినయ్...అంతేకాదు..ఖదీర్ మీ మతం లోని వివాహ ఆచారాలను కూడా రాయబోతున్నాను.
ధాంక్స్ మేడం. ఖదీర్ అన్నాడు.
అంతే మేడం ఇది అడుగుదామనే వచ్చాం. మీరు ఫీలయితే సారీ మేడం. సామంత్.
నో..నో మీరింత అభిమానంగా వచ్చినందుకు, నా బాధ్యత గుర్తుచేసినందుకు నేనే ధాంక్స్ చెప్పాలి.
ముగ్గురూ ధాంక్స్ చెప్పి వెళి పోయారు.
పెళ్ళి పుస్తకం మళ్ళీ తెరవరూ...అన్నట్టుగా వారి చూపులు నన్ను చుట్టుముట్టాయి.
నేను తరవాతి ఎపిసోడ్ గురించి ఆలోచనలో పడిపోయాను.

ప్రపంచ పుస్తక దినోత్సవ విశేషాలు ...

2010-04-22T23:39:00.005+05:30

ఏప్రిల్ 23 ప్రపంచ పుస్తక దినోత్సవం.
పాఠకుల్లారా ప్రపంచ పుస్తక దినోత్సవ శుభాకాంక్షలు.

ఈ రోజు ప్రపంచ పుస్తక దినోత్సవం గా పరిగణించడానికి విభిన్న కధనాలున్నా చాలా మంది ఒక ఏకాభిప్రాయానికి వచ్చిన కొన్ని అంశాలు.
1. సెవాంతెస్, షేక్సిపియర్, ఇన్కా గర్సిలాసో, వేగా అను రచయితలు 1616 ఇదే రోజున మరణించారు.
2. అంతేకాదు జోసెఫ్ ప్లా, వ్లాదిమర్, మారిస్ ద్రువాం ఇలా ఇంకా చాలా చాలా మంది ప్రపంచ ప్రఖ్యాత రచయితలు ఇదే రోజున మరణించడమో, జన్మించడమో జరగడం విశేషం.
3. ఇదే రోజున సెయింట్ జార్జ్ జన్మదినాన్ని స్పెయిన్ లో జరుపుకుంటారు. ఇప్పటికీ స్పెయిన్ లో ప్రతి పుస్తక కొనుగోలు పై ఒక గులాబీని గిఫ్ట్ గా ఇస్తారు.
ఇన్ని ప్రత్యేకతలున్న ఈ రోజును1995 లో యునెస్కో ప్రపంచ పుస్తక దినం గా ప్రకటించిండమేకాదు, ప్రపంచ పుస్తక మరియు కాపీ హక్కుల దినం గా జరపాలని, రచయితలను, ప్రచురణకర్తలను, పాఠకులను, ఉపాధ్యాయులను ఈ రోజున గౌరవించాలని సూచించింది. అంతర్జాలం, మీడియా కొంతవరకూ పుస్తకం మనుగడను అడ్డుకుంటున్నాయి. అందుకే..
పుస్తకాన్ని కొందాం. పుస్తకాన్ని బ్రతికించుకొందాం.
యుకె లోను ఐర్లాండులోను ప్రపంచ పుస్తక దినం ఒక ఘనమైన వేడుకగా జరుపుకుంటారు. ఆన్ లైన్లో రచయితలు తమ రచనలను చదివి వినిపిస్తారు. పాఠశాలలలో పుస్తక పఠనా పోటీలు నిర్వహిస్తారు. వీటినే రీడథాన్ (Readathon) అనడం విశేషం. అమెరికాలోనైతే వేల కొలది ఇ-బుక్ లను నెట్ లో పెట్టి వాటిలో కొన్ని పుస్తకాల మీద బడి పిల్లలకు ఏక్సలరేటెడ్ రీడింగ్ అనే కాంపిటీషన్ పెడతారు. (ఈ కాంపిటీషన్ ని ఈ సమ్వత్సరం మా స్కూలులో ప్రవేశ పెడుతున్నాం.)
అయితే కొన్ని దేశాలలో ఈ వేడుకను వేర్వేరు రోజుల్లో జరుపుకోవడం విశేషం. ఇది ఇంకా భారతదేశం లో అంత ప్రాచుర్యమ్లోకి రాలేదు.
అసలు ఏ పుస్తకమైనా ఎందుకు చదువుతాం. ఏం అనుభవం లోకి వస్తుంది. ఏ భావనలకు లోనవుతాం. ఏ రకమైన భావోద్రేకాలు ఎలా ఉత్ధాన స్ఠాయికి చేరుకుంటాయి. పుస్తకం లోకి నడవడమంటే... పరిచయ పాత్రలలోకి మనల్ని మనం వంపుకుంటామా ? లేదా మనలని రచయిత తనలో వంపు కుంటాడా? ఇది చాలా చక్కగా బొల్లోజు బాబా గారు తన బ్లాగులో ఒక కవితలో అంటారు..

పుస్తకం లోకి నడవడమంటే.....
ఎప్పుడో, ఎక్కడో, ఎవరో
ఒకడు
దోసెడు అక్షరాల్ని
కాలానికి అర్ఘ్యమిస్తాడు.
పిడికెడు ఆలోచనల్ని ఒడిసిపట్టుకొని
పుస్తకపుటలపై చల్లుతాడు.

ఎప్పుడో, ఎక్కడో, ఎవరో
ఒకడు
ఆ పుస్తకాన్ని తెరుస్తాడు.

ఒక జీవనది వాని గుండెల్లోకి
ప్రవహించటం మొదలౌతుంది.

ఒక సంగీతమేఘం
తేనె పాటల్ని వర్షిస్తూంటుంది.

ఆ రాగ స్పర్శకు వాని మనోయవనికపై
ఓ అపరిచిత అరణ్యం మొలకెత్తుతుంది.
వేన వేల స్వప్నాల పిట్టలు
రివ్వుమంటో ఎగిరి వచ్చి
మనో వనాన వాల్తాయి.
వసంతపు మొగ్గలు
పువ్వులుగా బద్దలవుతాయి.
పరిమళపు భ్రమరాలు ఝుమ్మంటో
వాడిని చుట్టుముడతాయి.

దివా సంధ్యలు, గెలుపోటములు,
సుఖ, దు:ఖాలు, రాగ ద్వేషాలు
అనుభూతి తరువులపై వాలిన
జంట పిచ్చుకలౌతాయి.

కెలడియోస్కోపులో ని
రంగురంగు గాజుముక్కలల్లే
అవే అక్షరాలు అసంఖ్యాక చిత్రాల్ని
ఆవిష్కరిస్తూంటాయి.

ఒక నన్నయ, ఒక వేమన, ఒక గురజాడ
లిప్తపాటు మెరిసి మాయమవుతారు.

నవరసాలూ వాటి దేహాల్ని లాక్కొచ్చి
కనుల వాకిట నిలిపి
రసావిష్కరణ జరిపిస్తాయి.

శత సహస్త్ర శిరఛ్ఛేద
ఖడ్గ పరిహాసం తళుక్కుమంటుంది.

తరాల్ని కలిపే రుధిరామృతం
కాల రేఖ పై లీలగా జారుతుంది.
*************

ఏదైనా ఓ పుస్తకంలోకి నడవటమంటే
పరిచిత పాత్రలలోకి
మనల్ని మనం ఒంపు కోవటమే కదా!

బొల్లోజు బాబా
బాబా గారికి కృతజ్ఞతలతో

బాల పాఠకులందరికీ...

2010-04-02T23:02:00.003+05:30

ఈనాడు అంతర్జాతీయ బాలల పుస్తక దినోత్సవం.
బాల పాఠకులందరికీ శుభాకాం క్షలు. . ఎలెక్ట్రానిక్ మీడియా, వీడియో గేంస్ ఎంతో ప్రబావం చూపుతున్న ఈ కాలం లో కూడా పిల్లలకి కధల పుస్తకాలంటే ప్రాణం. మీడియా ప్రభావం వలన మిగిలిన సాహిత్యం కాస్త కుంటుపడిందని అనక తప్పదు. నిజానికి ఇటువంటి పరిస్థితులలో బాల సాహిత్యం, వ్యక్తిత్వ వికాస సాహిత్యం మాత్రమే ప్రపంచం లో నిలదొక్కుకోగలిగిందని చెప్పవచ్చు. ఇదంతా వేరే విషయం.
ఇంతకీ ఈ బాలల పుస్తకదినోత్సవం ఎలా మొదలయింది. దీనికో చిన్న కధ ఉంది.
ఫెయిరీ టేల్స్ అంటే పిల్లలకి చాలా ఇష్టం. అయితే ఈ ఫెయిరీ టేల్స్ సృష్టికర్త " హాన్ స్ క్రిష్టియన్ ఆండర్సన్ " డెన్మార్క్ లో పుట్టిన ఈయన 1805-1875 మధ్య నివశించాడు. ఈయన రాసిన అనేక కధలలో .. ద లిటిల్ మెర్మైడ్, ద స్నో క్వీన్, ద ప్రిన్సెస్ అండ్ ద పీ మరియు థంబులీన్
చాలా ప్రాచుర్యం పొందాయి. అంతేకాదు ఈయన రాసిన జానపద కధలు 150 భాషల్లోకి అనువదింపబడ్డాయి. అంతేనా..ఎన్నో ఏనిమేషన్ చిత్రాలు, పిల్లల నాటికలకు, సినిమాలకు ప్రేరణని ఇచ్చాయి. మరి ఈ రోజెందుకు బాలల పుస్తక దినోత్సవం ఎందుకు జరుపుతున్నారు. ఎందుకంటే ఈరోజు ఆండర్సన్ ( ఏప్రిల్ 2 ) గారి పుట్టిన రోజు కాబట్టి. మరో విశేషం ఏమంటే ఈరోజు ఆయన 205 వ జయంతి. ఈ దినోత్సవ ఉద్దేశ్యం ఏమంటే బాలలలో పఠనాసక్తిని పెంపొందించడమే..
ఈ రోజుని మా స్కూల్ లో చాలా బాగా జరుపుకున్నాం. సం.రం. అంతా మా పిల్లలు చదివిన పుస్తకాల పేర్లు ఒక డైరీ లో రాసుకుంటారు. ఈ రోజున పేరెట్స్ ని పిలిచి వారెదురుగా పిల్లలు వారు చదివిన పుస్తకాలలో వానికి నచ్చిన కధని అందరికీ చెపుతారు. ఈ కార్యక్రమానికి తల్లిదండ్రులే న్యాయనిర్ణేతలు గా వ్యవ హరించి బాగా చెప్పిన పిల్లలని ఎంపిక చేస్తారు. వారికి బహుమతులివ్వడం జరుగుతుంది. ఇంట్రెస్టింగ్ విషయమేమంటే
కార్యక్రమానికి వచ్చిన తల్లిదండ్రులు చాలా మంది పిల్లల కధల పుస్తకాలు తెచ్చి మిగిలిన పిల్లలకి పంచి పెట్టారు. ఈ విద్యాసం వత్సరమ్లో ఈ ఉత్సవాన్ని మరింత వెరైటీగా ఎంత వెరైటీ అంటే భారతదేశమ్లో మరే ఇతర స్కూలు జరపలేనంతగా జరపాలని ప్రణాళిక లు సిధ్ధం చేసేసాం.
ఎలా అనుకుంటున్నారా... అమ్మో ఇపుడు చెప్పను... బై.

అసహజ జీవనం ?

2010-03-24T19:47:00.001+05:30

" వివాహానికి ముందు శృంగారం, స్త్రీ, పురుషులు వివాహం చేసుకోకుండా సహజీవనం సాగించడం అనేది నేరం కాదు. ఇద్దరు వయోజనులు సహజీవనం చేయాలనుకుంటే అందులో నేరమేమిటి? అది నేరమవుతుందా? సహజీవనం నేరం కాదు " అని సుప్రీంకోర్టు ప్రధాన న్యాయమూర్తి జస్టిస్ కె.జి. బాలకృష్ణన్ తో కూడిన ధర్మాసనం పేర్కొంది. ఈ రెండింటినీ నిషేధించే చట్టమేదీ లేదని కూడా పేర్కొంది.

నిజమే...ఈ దేశ పౌరుని జీవన విధానాన్ని నియంత్రించే చట్టాలేమీ మన భారతీయ శిక్షాస్మృతి లో లేక పోవడం దురదృష్టకరం. మన సంస్కృతిని కాపాడ వలసిన ధర్మాన్ని, బాధ్యతని యువత విస్మరించడం కూడా నేరపరిధిలోకి రాదు. ప్రపంచం లో అత్యధిక శాతం యవత/యువశక్తి కలిగిన మనదేశ పౌరుడు పెడదోవ పడుతున్నా, ఈ దేశ చట్టాలు, సమాజం ప్రేక్షక పాత్ర వహించాల్సిందే. ఎందుకంటే social conduct of an individual is not legalised. No law can prevent the fall of moral values of an indiviual.

వివాహానికి ముందు శృంగారం మంచిదా, కాదా అనేది మనిషి వ్యక్తిత్వం, కుటుంబ నేపధ్యం మీద ఆధారపడిఉంటుంది. చదువు, సంస్కారం ఉన్నయువతకి కొంత విచక్షణా జ్ఞానం ఉంటుంది. గ్రామీణ సమాజం లో ఇటువంటి ఆచారం అనాదిగా ఉన్నప్పటికీ ఇది సంస్కృతి మీద అంత ప్రభావం చూపక పోవచ్చు.

స్త్రీ, పురుషులు వివాహం చేసుకోకుండా సహజీవనం (Dating) సాగించడం.. మన వివాహ వ్యవస్థ మీద చాలా ప్రభావం ఉంటుంది. పటిష్టమయిన వివాహ సంప్రదాయానికి చరమగీతం పాడినట్లే. దేశవిదేశాల్లో ఎంతో ప్రాచుర్యం పొందిన మన వివాహ విధానం లోని ఆచార వ్యవహారాలను అటకెక్కించినట్లే. అభివృధ్ధి చెందుతున్న దేశాలకు ధీటుగా భారత్ ను నిలబెడుతున్న అనేక అంశాల్లో ఈ దేశ సంస్కృతి ఒకటి. ఎంతో మంది విదేశీయులు మన వివాహ వ్యవస్థని అధ్యయనం చేసి.. భారతదేశం లో కుటుంబ వ్యవస్థకు మూలాలు వివాహ మంత్రాలలోనూ, వివాహ సంప్రదాయం లోను, వారి కట్టుబాట్లలోనూ ఉందని కొనియాడేరు.
ఈ సహజీవనం దేశ నైతిక విలువలపై వ్యతిరేక ప్రభావం చూపుతుంది అనడం లో సందేహం లేదు. ఆడ మగ డేటింగ్లో ప్రస్తుత సమాజ పరిస్థితుల్లో ఎన్ని అనర్ధాలు వస్తాయో అనూహ్యం. అంతేకాదు రాధాకృష్ణుల మధురానుబంధాన్ని..మానవమాత్రుల విచ్చలవిడితనంతో సరి పోల్చడం వారి విజ్ఞత కి వదిలేయాలి.

కొసమెరుపు : సీతారామ కల్యాణమందు ప్రస్తావించిన మంత్రోపదేశాలే నేటికీ మన హిందూ వివాహ విధానమ్లో అనుసరిస్తున్నాం.
సీతారాముల దాంపత్యమంత అన్యోన్యంగా ఉండాలని ఆ మంత్రముల అర్ధం.
లోక కల్యాణరాముని కల్యాణం జరుగు శ్రీరామ నవమి రోజున ఇటువంటి వార్త వినడం.

తెలుగు వెలుగుల ఉగాది...

2010-03-16T08:48:00.005+05:30

తెలుగు వెలుగుల ఉగాది
తేవాలి అందరి జీవితాలలో
సుఖ సంతోషాల కేళి
ఉగాది శుభాకాం క్షలతో
మీ
శ్రీనిక

విలక్షణమైన స్త్రీని నేను...

2010-03-14T22:32:00.005+05:30

మాయా ఏంజిలౌ

అమెరికా జాత్యహంకారపు పడగ నీడలోఅణగద్రొక్కబడిన నల్ల జాతి బానిస జీవుల జీవితాలలో తమ రచనలతో వెలుగులు నింపిన అతికొద్దిమంది నల్లజాతీయులలోమాయా ఏంజిలౌ ఒకరు.విలక్షణమైన వ్యక్తిత్వం, నిర్మొహమాటమైన వైఖరి ఈమె రచనల్లో కనిపిస్తుంది. బహుముఖ ప్రజ్ఞాశాలి వివిధ రచనా ప్రక్రియలలో అసాధారాణ ప్రతిభ ఆవిడ సొంతం. Still I rise, On the pulse of morning, Life doesn't frighten me etc., అనే కవితలుI know why the caged bird sings, The heart of a woman, Phenomenal woman అనే కవితలు, ఆత్మకధలు ఆమెకి బాగా
పేరు తెచ్చిన రచనలు.
Phenomenal woman
(స్వేచ్ఛానువాదం)

అందమైన యువతులు
నా సౌందర్య రహస్యమేమిటాని
ఆశ్చర్య పోతూంటారు..
నేను అందంగానో లేక
ఫ్యాషన్ మోడల్ అంత
నాజూకుగానో లేను
అలాగని నేను చెపితే
అబధ్ధాలనుకుంటారు
నా సౌందర్యం
నా చేతుల కలయికలో
నా తొడల నిడివిలో
నా హుందా నడకలో
నా పెదవుల నుడికారంలో ఉంది
విలక్షణంగా
నేనొక స్త్రీని
విలక్షణమైన
స్త్రీని నేను

మీరు కోరినట్లు
నేనో గదిలోకి వెళ్తాను,
ఒక పురుషుని వద్దకు,
వారు నిలబడి లేదా మోకరిల్లి
తేనెటీగల్లా
నా చుట్టూ తిరుగుతూంటారు..
నా కళ్ళలో జ్వాల
నా పలువరుసలో మెరుపు
నా నడుములో ఊపు
నా అడుగులో ఆనందం
విలక్షణంగా
కలిగిన
నేనొక స్త్రీని
విలక్షణమైన
స్త్రీని నేను

నాలోని నన్ను చూసిన
పురుషులు అచ్చెరువొందుతారు,
నా అంతరంగ రహస్యాలను
స్పృశించాలని
విఫల యత్నాలు చేస్తారు..
నే చూపించ బోయినా
చూడలేక పోయామంటారు..
నా సౌందర్య
నా వీపు వంపులోను
నా చిరునవ్వు కాంతిలోను
నా స్తనముల ఊపులోనూ
నా శృంగార రీతిలోనూ
విలక్షణంగా కలిగిన
నేనొక స్త్రీని
విలక్షణమైన
స్త్రీని నేను...

మీకిపుడు తెలిసే ఉంటుంది
నా తల ఎందుకు దించలేదో
నేను ఎక్కువ నినదించను
నా ఆగమనం
నిను గర్వ పరచడానికే
నా సౌందర్యం
నా అడుగుల సవ్వడిలోను
నా శిరోజాల వంపులలోను
నా అరచేతిలోను
నా ఆత్మ రక్షణలోను
విలక్షణంగా కలిగిన
నేనొక స్త్రీని
విలక్షణమైన
స్త్రీని నేను...

మ...ది...శు..

2010-03-08T05:00:00.004+05:30

మహిళా బ్లాగర్లందరికీ అంతర్జాతీయ మహిళాదినోత్సవ శుభాకాంక్షలు.

స్త్రీ బాహ్య నిర్బంధాలనుండి విముక్తి కావడం ఒక క్రమమయితే అంతర బంధాలనుండి విముక్తి కావడం మరో క్రమం.
అయితే ఈ విముక్తి ని ఒక వస్తువుగా సాగిన సాహిత్యం స్త్రీవాద సాహిత్యం గా రూపాంతరం చెంది
అన్ని సాహితీ ప్రక్రియలలోనుప్రవేశించి సమాజాన్ని ప్రశ్నించింది, ఆలోచింప చేసింది, బాధ్యతను గుర్తుచేసింది. దశాబ్దాలుగా సాగిన పోరాటమ్లో ప్రతి మైలురాయి అనేక త్యాగాలకు నిదర్శనగా చెప్పవచ్చు. ఆదర్శనీయమైన విషయమేమిటంటే ఈ విముక్తి పోరాటం లో కేవలం మహిళలే కాదు, వారికి చేదోడు వాదోడుగా పురుషులు కూడా పాలు పంచుకుని సమాజాన్ని చైతన్యవంతం చేయడం లో వారుకూడా కృతకృత్యులయ్యారనడం అతిసయోక్తి కాదు. గడచిన రెండు దశాబ్దాలుగా వచ్చిన స్త్రీవాద సాహిత్యం లో స్త్రీ సమస్యలని అర్ధం చేసుకోవడం లో కవులు గొప్ప పరిణితి చెం దారు.
కానీ ఎనభై దశకాల్లోనూ...తొంభై దశకాల్లోనూ ఉన్నంత ఉధృతి ఈ దశాబ్దం లో లేదనే చెప్పవచ్చు. గ్లోబలీకరణ, సాంకేతిక విజ్ఞాన అభివృధ్ధి, మహిళల అక్షరాస్యత శాతం పెరుగుదల, విద్యాలయాలలో, ఉద్యోగాలలో మహిళలకు రిజర్వేషన్లు,ఆర్ధిక స్వాలంబన..సమస్య సాంద్రతని కొంతవరకూ తగ్గించాయని కూడా చెప్పవచ్చు...అంతేకాదు మహిళా బిల్లును ప్రవేశపెట్టటానికి జరుగుతున్న పరిణామాలు హర్షణీయం.
అంతర్జాతీయ మహిళాదినోత్సవ సందర్భంగా...
ఎనభైలలోనూ, తొంభైల లోనూ అక్షరబధ్ధం చేసిన రెండు కవితలని ఇక్క డ ....
అమ్మ
అల్లం నారాయణ.

పొద్దుతో పాటూ
పంట పొలంలో పొడిచేది అమ్మ
చెమట ముత్యాల్లోకి జారి
కత్తిలాంటి మా కండరాల్లోకి ఇంకేది
అమ్మ నుదుటి సింధూరం పువ్వు
' అమ్మా ఆకలే ' అనడం తప్ప
అమ్మ కడుపులో కాసిన
ఎర్రటెండను పట్టించుకున్నదెవ్వడు?
మొగ్గలకు రెక్కలతికిన అమ్మ
నల్లనల్లని రేగళ్ళ నాగేటి చాలయింది
కంట్లో కారు చీకట్లు దాచుకొని
వెన్నెల నవ్వుల్ని విరిసింది
పక్షుల్ని పిలిచి మాకు పాటలు నేర్పింది
పొగ చూరిన పాత వంటగది కావల
నాకోసం మా అమ్మ
ప్రపంచం కిటికీ తెరిచింది
ప్రపంచం కిటికీ గుండా
నే ఆవలి గట్టుకి దూకేసా
మా అమ్మ మాత్రం
వంటింటి గడప మీద శిలయింది
పసుపు కుంకుమలు, తాళిబొట్టు, కాలిపట్టెడ
పాతివ్రత్య ధర్మం మీద పూర్వీకుడు రాసిన పుస్తకం
సాక్షీ భూతాలుగా
మాఅమ్మ వంటింటి గడప మీద
శిలువబడింది.....

ఆంధ్రజ్యోతి దినపత్రిక 29.03.1988 అల్లం నారాయణ గారు ఆంధ్రజ్యోతి సీనియర్ సబ్ ఎడిటర్ గా పనిచేసారు. " జగిత్యాల పల్లె " కవితా సంపుటి ప్రచురించారు..
---------------------------------------------------------------------

పంజరం
శిలాలోలిత

పంజరాన్నీ నేనే
పక్షినీ నేనే
నాకు నేనే ఉచ్చును బిగించుకొంటాను
చిలుక పలుకులే తెలుసు
గొంతెత్తి పాడలేని మూగజీవాన్ని--
కవిత్వం రాయలేని సమాజపు పక్షపాతాన్ని నిరసించాలనీ
నాలోని కోటానుకోట్ల కణాల యుధ్ధారావాల్ని
నాలోని విద్యుత్ ప్రవాహ సంగీతాన్ని
నాలోని ఆలోచనాలోచనాల సముద్రాల్ని వెలికి తీసి
నాలోని నన్ను ఆవిష్కరిద్దామనే నా భావన

కలలున్నాయి కానీ అన్నీ డొల్లలే
కధలున్నాయి కాని ఎవరో పూర్తిచేసిన ముగింపులే
కనులున్నాయి కానీ ఎవరో కత్తిరించిన రెటీనాలే
సమాజం లో బతకని నువ్వు
నీ పుట్టుకా సమాధి పంజరమే అయిన నువ్వు--
పంజరం ఊచలెన్నో లెక్కెట్టుకో
కవిత్వం కవులే రాయగలరు
నీకు అక్షరాలేం తెలుసునన్న పురుషాహంకారం
ఔను నాకు అక్షరాలు తెలియవు
నాకు పొడి మాటలు తెలియవు
అసలు అక్షరాలేవి ? అయ్యో వాటికి ప్రాణమేది ?
ఎర్రటి రక్తం లో స్నానాలు చేస్తున్నాయవి
వెలికి తీద్దామన్న యత్నం లో నా వేళ్ళు తెగిరక్తమ్లో కలిశాయి

చేతులే లేని నేను
హత్య చేయబడ్డ అక్షరాలతో నేను
అసలు భాషే
లేని నేను ఎలా మాట్లాడేది ? ఎలా రాసేది ?

నా చేతికి ' మాడిఫై' చేయబడిన రూపం లో గాజుల సంకెళ్ళు
నా బతుకే ధన్యమనే బ్రెయిన్ వాష్ లు
నా నాలుక తెగ్గొట్టినా, చేతుల్ని నరికేసినా
అక్షరాల్ని విరిచేసినా, భాషను లేకుండా దగ్ధం చేసినా
నేను మరణించలేదు.

నేను మరణించను
ఔను -- ఈ నెత్తుటిలో కొత్తపుట్టుక నాది
ఈ పుట్టుక నా స్వంతం
జనన మరణాల పట్టికని నేనే తయారు చేసుకోగలను
ఎవరికీ నన్ను కాల్చడానికీ ముంచడానికీ చంపడానికీ
వదిలేయడానికీ, ఉంచుకోవడానికీ, ఎంచు కోవడానికీ
సర్వహక్కులు ధారాదత్తం చేయబడలేదు
నేను వైప్లవ్య గీతిని
మూగతనం తెలిసిన నాకు భాషెంత బాగుంటుందో తెలుసు
కష్టాలలో మునిగి తేలిన నాకు కడసారి వీడ్కోలు కొత్తకాదు
కన్నీళ్ళ నదులకి ఆనకట్టలు కట్టి
కొత్త వంతెనలు కట్టుకోగలను..

నేనొక ప్రాణినేనన్న గుర్తింపు కోసం
నేనొక సమిధనౌతాను
నన్ను నేను నిలబెట్టుకొనే క్రమం లో
నా పాదాల క్రింద ఇసుకలా జారిపోతున్న కుబుసాన్ని
తృణీకరిస్తున్నాను

భాషను దూరం చేసిన ప్రణాళికాధికారులకు
నేనొక కొత్త నిఘంటువును
బతుకును చౌరస్తాను చేసిన వ్యవహారికపు ముసుగులకు
నేనొక కంచుకత్తిని
నేను తెగినా నేలరాలినా, నెత్తురు చిమ్మినా
నేనొక మాట్లాడగల శక్తినని నిరూపిస్తాను
పోరు బాట నాకు కొత్తకాదు
చాళ్ళనిండా విత్తనాలు మొలకెత్తుతూనే ఉన్నాయి...
( " పంజరాన్నీ నేనే పక్షిని నేనే " -- (1999) కవితా సంపుటి నుండి )

శిలాలోలిత : అసలు పేరు పి. లక్ష్మి ప్రచురిత రచనలు: కవయిత్రుల కవిత్వం లో స్త్రీ మనోభావాలు (1993) ఎంతెంత దూరం (2005) నారి సారించి - సాహిత్య వ్యాసాలు (2006) చిరునామా: ' సూఫీఘర్ ' 1-7-9/1/3, చైతన్యపురి,హైదరాబాదు-80 ఫోన్ : 040 - 24040890, 9849156588.
అంతర్జాతీయ మహిళా దినోత్సవ సందర్భంగా
ఒక విలక్షణ మైన వ్యాసం ఇక్కడ లింకులో...
http://timesofindia.indiatimes.com/city/lucknow/No-need-for-Reserved-Class-to-travel-ahead/articleshow/5655723.cms

నాకు తెల్సు...

2010-03-04T23:23:00.004+05:30

నడుస్తున్న రోడ్డు
రెండుగాచీలిపోయిందంటే
రెండునాల్కల నగర
కుహరం లోకి ప్రవహిస్తున్నట్లే
రోడ్డుకిరువైపులా ఉండే
మహా వృక్షాలన్నీ మరుగుజ్జుల్లా
రోడ్డుమధ్యలో నిలబడ్డాయంటే
నగరీకరణ వరదలో
అస్థిత్వ వేదనకి అర్ఘ్యమిచ్చినట్లే
వేడి వేడి తారు చల్లచల్లగా
పచ్చని పొలాల్లోకి పారిందంటే
మనుగడపై సునామీలు మోహరించినట్లే
ఉపాధి అవకాశాల్ని
లారీల్నిండా మోసుకొచ్చి రాత్రికిరాత్రే
పల్లె పల్లెనీ తరలించుకుపోయిన
వైనం తెల్సునాకు...
నడకని, నడతనీ.......ఉనికినీ, ఉన్నతినీ
జోరుని, హోరునీ.....స్వచ్ఛతని, పవిత్రతనీ
సాగర సంగమంలో పోగొట్టుకున్న నది
భవన కూలీల చెమటలో
కరుగుతున్న పనిమనిషి కండల్లో
కూరల బండివాని అరిగిపోయిన చెప్పుల్లో
ఇంకా అక్కడక్కడా...
నా నది ఇంకి పోయిన
వైనం తెల్సునాకు...

ప్రేమ పేగునెవరో....

2010-02-08T04:47:00.006+05:30

తల్లి ప్రేమ పేగునెవరో
అదిమిపెట్టి కసాయి కత్తితో
కస కసా కోసేసినపుడు
అమ్మా...అన్న పిలుపుకి
స్వరపేటిక కవాటాలు
తెరుచుకోనపుడు
దుఖ్ఖం చెలియల కట్టని దాటి
సునామీలా మోహరించినపుడు
ప్రాణాలు సుడిగాలిలో
దీపాలయినపుడు
కారిన రక్తపు బొట్టునడుగు
ఏ ముష్కరుని దాహార్తి తీరిందో
కాలిన శవాలనడుగు
ఏ జీవులు శవాలై బ్రతుకుతున్నయో
బడుగు జీవుల నెత్తుటి కన్నీళ్ళ నడుగు
ఏ బంధాలు తెగి విలపిస్తున్నాయో
ఉగ్రవాద రక్కసి
రెండు దాడుల నడుమ
రక్తం ఏరులై పారినపుడు
ఛిద్రమైన జీవితాలెన్నో
శరణాలయాల్లోమౌనమేఘాల్ని
మోస్తున్న క్షతగాత్రులెందరో
తల్లిని కోల్పోయిన ఓ చిట్టి తల్లీ...
అనంత వాహిని నీ శోకం
ఏ లోటూ పూడ్చలేదు ఈ లోకం
మానవత్వం రిక్త హస్తాలతో
నీ ముందు తలదించుకుంది....
(కరాచీలో ఉగ్రవాదుల రెండు దాడుల వార్త చదివాకా)

అన్యోన్య దాంపత్యం..?

2010-01-18T22:01:00.012+05:30

హిందూ వివాహ ప్రాశస్త్యము.
పదమూడవ భాగము

పెళ్ళి పుస్తకం - 13

సప్తపది లోని ప్రతి అడుగుకు ఒక అర్ధము, పరమార్ధము చూసాం.
ఈ సప్తపది తరువాత కొన్ని రకాల హూమాలు జరుగుతాయి.
అవి ప్రధాన హూమం, లాజా హూమం, ప్రవేశ హూమం,ఇదికాక,
శనికల్లు తొక్కడం (పూర్వం మషాలా సామాను నూరడానికి ఉపయోగించిన
ఒక రాయి..ఇది మనం పూజ గదిలో ఉంచుకునే రాతి గౌరిదేవిని పోలి
ఉంటుంది దీ నినే శనికల్లు అంటారు) శేష హూమం వంటి
తంతులు జరిపిస్తారు. ప్రస్తుతం వీటిలో కొన్ని ఆచరణలో లేవు.
ఇహ పోతే వీటికి ముందు వరుడు కొన్ని మంత్రాలు చెపుతాడు.
ఇవి ఇల్లాలు ఏ విధంగా అత్తవారింట నడచుకోవాలో సూచిస్తాయి.

వరుడు: సభాసప్తవదాభవ సఖాయౌ సప్తదాబభూవ,
సఖ్యంతేగమే యగేం, సఖ్యాత్తే మాయోషగ్గం
సఖ్యాన్మే మాయోష్టా సమయా వ: సంకల్పావహై
సంప్రియౌ రోచిష్టూ సుమనస్యమౌనౌ
ఇష మూర్జమఖి సమ్వసానౌ సం నౌ
మనాగంసి సం వ్ర తా సముచిత్తన్యకరమ్ !

తా : నాతో ఏడడుగులు నడచి నాకు స్నేహితురాలవుకమ్ము. ఏడడుగులు మనిద్దరం నడిస్తే మనం స్నేహితులమౌతాం. అప్పుడే నేను నీ స్నేహాన్ని పొందుతాను. నీ స్నేహన్నుంచి ఎప్పుడూ వియోగం పొందకు. పరస్పరం ప్రేమతో, అనుకూల దాంపత్యంతో ప్రకాశిస్తూ నిండు మనసుతో ఆహారాన్ని, బలాన్ని కలిసి పొందుతూ కలిసి ఉందాం, కలిసి ఆలోచించుకుందాం, అలాగే అన్ని విషయాలలోనూ బాహ్యేంద్రియాలు కూడా కలిసి ఉండేటట్లు నడచుకుందాం.
వరుడు: అరణ్యమణం నుదేవా కన్యా అగ్నిమయక్షత్ర ఇమాం దేవో అధ్యర:
ప్రేతో ముంచాతి నాముతస్సు బద్దామముతస్కరత్
తా: వెనుక స్త్రీలు అగ్ని దేవుణ్ణి పూజించి కోరిన భర్తను పొందిరి. లోకోపకారియైన ఆ అగ్ని దేవుడు ఈ చిన్నదానికి వివాహమైన తరువాత పుట్టింటి మీద మమకారం తగ్గించి అత్తింటి మీద విశేషానురాగం
గల దానిగా చేయుచుండుగాక!
వరుడు: సమ్రాజ్ఞి శ్వశురేభవనసమ్రాజ్ఞి శ్వశ్ర్వాంభవ,
ననాందరి సమ్రాజ్ఞివ, సమ్రాజ్ఞి అధి దేవ్యేషు:
తా : మామయందు, అత్తయందు, ఆడబిడ్డలయందు, బావలయందు, మరుదుల యందు,
సముచిత ప్రేమాభిమానాలతో నుండుము.
వరుడు: త్వష్టా జాయామజన యత్తత్వష్టా స్త్వైత్వాం పతితం
త్వష్టా సహస్ర మాయూగ్గంషి దీర్ఘమాయు: కృణోతవాం
తా : ఓ మనసా: బ్రహ్మ ఈ వధువును నాకు భార్యగా సృష్టించెను.
నన్ను ఈ కన్యకు భర్తగా సృష్టించెను.
ఆ బ్రహ్మ దేవుడు మా ఇద్దరికి సకల సంపదల నిచ్చి
చిరాయుష్యమును కలిగించుగాక !
వధువు : ఆవశ్యం త్వా మనసా చేకితానం తనసో జాతం తవసో విభ్హుతం
ఇహ ప్రజామి హరయిగ్గం రరాణ: ప్రజా యవ్వప్రజాయా పుత్రకామ !
తా : నిన్ను నా అబిప్రాయము తెలిసిన వానిగను, మంచి సంస్కారంతో పుట్టిన వానిని గాను,
మంచి నియమాలతో పెంచుకున్న తేజస్సు గల వానిగను, నేను గ్రహించాను,
ఓ సంతానాభిలాషి: నీవు నాతోనే సంతానాన్ని గని
సిరి సంపదల నిచ్చి సుఖపడుము.

ఇద్దరు: సంజంతు విశ్వేదేవాస్పమాపా హృదయానినౌ
సంమాత రిళ్వా సంధాతా సముదేష్టి రిదేస్టునో ll
తా ll విశ్వదేవులు, పవిత్రోదకాలు, వాయువు, బ్రహ్మ మన మనస్సులను
ఎల్లప్పుడు స్నేహంతో కూడునట్లు చేయుదురుగాక: సరస్వతి మన మెప్పుడు
అనుకూలంగా మాట్లాడుకొనేటట్లు చూచుగాక !
పెద్దలు: అభివర్ధతాం పయసాభిరాష్ట్రేణ వర్ధతాం,
రయ్యా సహస్ర పోషనే మౌకాస్తామన పేక్షితౌ
తా ll ఈ వధువు ఎల్లప్పుడూ పాడిపంటలతోను, ఇండ్లతోను,
భూములతోను, సంపద మిమ్ములను అభివృధ్ధి చేయుగాక!
ఈ దంపతులు సర్వసమృధ్ధితో దేనికిని ఇతరులను
అపేక్షించకుండా ఉందురు గాక !
పెద్దలు : పుత్రిణేమా కుమారిణా నిర్వమాయుర్వ్య
శ్నుతం ఉభా హిరణ్యా పేశసా వేతిహూత్రా కృతద్వసూ
తా ll ఈ నూతన దంపతులిద్దరును, కుమారులు, కుమారికలు
గలిగి పరిశుధ్ధమైన బంగారు కాంతితో మంచి పనులు చేస్తూ
సిరిసంపదలు సంపాదించి మంచి ఆయుర్ధాయాన్ని పొందుదురుగాక !

కొసమెరుపు:

Wife wanted

A man inserted an 'ad' in the classifieds :
" Wife Wanted".
Next day, he received a hundred letters.
They all said the same thing
"You can have mine."

A quarrel

After a quarrel, a wife said to her husband,
"You know, I was a fool when I married you."
And the husband replied,
"Yes, dear, but I was in love and didn't notice it."

బూరె పోయె ...బుధ్ధి వచ్చే !!

2010-01-17T08:03:00.008+05:30

ఏవిటి..బూరెపోవడమేంటి బుధ్ధి రావడమేమిటి అనుకుంటున్నారా? ఇది వివరంగా చెప్పాలంటే.... కొంచెం చరిత్రలోకి వెళ్ళి అపుడు వర్తమానం లోకి వస్తాను. చిన్నప్పటినుండి బూరెలంటే నాకు చచ్చేంత ఇష్టం. అసలు..బాగా చిన్నప్పుడయితే బూరి నాకొక మిస్టరీ.
బూరె లోపలికి ఆ పూర్ణం ఎలా వెళ్ళిందబ్బా.... అని.
ఏ సినిమా తీసినా ఐటమ్ సాంగ్ ఎంత కంపల్సరీయో

చిన్నప్పటినుండి మా ఇంట్లో ఏ పండుగ చేసినా
మెన్యూలో బూరె ఐటమ్ ఉండాల్సిందే.
సో.. అలా నా జీవితం బూరితో తీయని
అనుబంధాన్ని పెనవేసుకుంది.
ఎక్కడ ఏ ఫంక్షనికి వెళ్ళినా నా కళ్ళు బూరెల కోసమే వెతికేవి.
బంధు వర్గాలలో ఈ విషయం తెలిసిపోయి
చిన్నప్పుడు నన్ను ఏడిపించేవారు కూడా..
చిన్నప్పటినుండి గారాల పట్టీని కాబట్టి వంట
నేర్పలేదు.(నేర్చుకోలేదు) పైగా సగం జీవితం
చదువులకే సరిపోయింది. బూరెలు
తినడం మీద ఇంట్రస్ట్ పెంచుకున్నానే తప్ప
వాటిని వండడం నేర్చుకోవాలని ఎపుడూ అనుకోలేదు.

పెళ్ళయ్యాకా తెలిసింది మావారికి కూడా బూరెలంటే మహా ఇష్టమని.....
అప్పుడే నేనో నిర్ణయం తీసేసుకున్నాను.
ఎలాగయినా బూరెలు వండటం నేర్చుకోవాలి.
మరొహటేంటంటే నాకు బూరెలు వండడం
రాదని ఆయనికి తెలిసి పోయింది.
వెంటనే దీని గురించి స్టడీ చేయాలనుకున్నాను.
అయితే ఎలా...? ఎవర్నయినా అడగాలంటే చిన్నతన మనిపించింది.
మా వారు నా బాధ నర్ధం చేసుకుని..
ఓ రోజు... నీకో విలువయిన గిఫ్టు తెచ్చానోయ్.
ఏవిటండీ..వంట చేస్తున్నాను..
అబ్బ ! కాసేపు ఆ స్టౌ ఆపి ఇటు రావే చూద్దువుగాని..
ఇక తప్పేటట్టు లేదు. స్టౌ ఆపి వెళ్ళాను.
ఆయన చేతిలో ఒక గిఫ్టు పాక్.
ఏవిటండీ...నక్లెస్సా !..మొఖం చాటంత చేసుకుని..
ఛీ..ఛీ..అంత కంటే గొప్పదోయ్. అంటూ నా చేతిలో పెట్టారు.
ఓపెన్ చేయ్...
మెల్ల మెల్లగ ఓపెన్ చేసేసరికి చేతిలోంచి జారిపడింది...
' అన్నపూర్ణ - వంటలు, పిండివంటలు ' పుస్తకం.
వంటలు రావని భార్యని ఛీదరించుకొని
బాధలు పెట్టిన భర్తలెందరినో చూసాను.
కాని మావారు ఎంత మంచి వారో...వంటల పుస్తకం
తీసుకొచ్చి నేర్చుకోమని అవకాశం ఇవ్వడం,
ఆయన ప్రోత్సాహం నన్ను మరింత రెచ్చగొట్టింది.
ఈ రోజెలాగైయినా బూరెలు వండుతానండి...
వంట అయిపో్యాకా బూరెలు ఐటం చదివాను.
ఒక్క సారే మనసంతా తేలికైపోయినట్లయింది..
ఏవండీ చూసారా! బూరెలు వండడం చాలా ఈజీ.
అయితే ఈ రోజు స్పెషల్ ...బూరెలన్నమాట....మావారు..
వెంఠనే పప్పు నానబెట్టేసాను...
సూచనల ప్రకారం ఫాలో అయిపోయాను.
ఆయనయితే వండబోయే బూరెలను తలచుకొని
గాల్లో తేలిపోతునట్లు న్నారు. పిల్లలనిద్దరిని తెగ ఆడించేస్తూన్నారు.
నిజం చెప్పొద్దూ...నా పరిస్థితి అలాగే ఉంది.
ఇంత పెద్ద సమస్య ...ఎంత సింపుల్ గా తీరిపోతుందా ని...
పప్పు గ్రైండర్ లో వేసి పక్కన పెట్టుకున్నాను.
ఇపుడు పూర్ణం తయారీ...
పూర్ణం కలుపుతుంటుంటే మెల్ల మెల్లగా
అది పలుచగా తయారయింది.
అది వుండలు చేసుకునే వీలు లేదు. అంతా వేస్ట్.
ఎందుకలా తయారయిందో అర్ధం కాలేదు.
మరో ప్రక్క బూరెల వంట ఫెయిలయిందే అన్న బాధ...
వెనకనుంచి మావారు..
నెవర్ మైండ్..ఫస్టైమ్ కదా. నెక్స్టైమ్ బెటర్ లక్...
అంటూ ఆయన బైటకెళ్ళిపోయారు..
నా కోరిక మరింత బలపడింది.
ఈ సారి ఎలాగయినా సాధించాలి.
మరో రోజు...ఒకటికి పదిసార్లు చదివి మొదలు పెట్టాను.
సక్సెస్ ఖాయం అని పిస్తుంది.
నిజమే...సక్సెస్...
దోర దోరగా, వేడి వేడిగా బూరెలు రెడీ....
బూరెను చిదిమి కాసిన నెయ్యిని
మధ్యలో వేసి తింటే...ఆహా ఏమి రుచి !
అని అనుకుంటూంటే...వెనక నుంచి మావారు...
ఎవిటోయ్...చుట్టూ ఉన్న పిండి ఇంత థిక్ గా ఉంది.
ఒకె..ఒకె..నాట్ సో బేడ్..
షిట్ ! మళ్ళీ ఫెయిల్....
No. No. Half lost is half won. అనుకుని
కాన్ఫిడెంస్ బిల్డప్ చేసుకున్నాను.
ఈ సారేమయినా సంక్రాంతికి సాధించాలి.
నా ఫ్రెండ్ సరిత వంటల గురించి
http://www.sailusfood.com/ లోచూడమంది.
ఓహ్.మంచి ఫోటోలతో చాలా బాగుంది సైటు.
ఇంచుమించు ఇందులో కూడా ఒకేలా ఉంది.
చక చకా అన్ని పనులు జరిగి పోయాయ్.
సల సలా కాగుతున్న నూనెలో ఒకటి ఒకటిగా
వేస్తున్నాను....ఝమ ఝమలు ముక్కు
పుటాల్లో గిలిగింతలు పెడుతున్నాయి. ఇంతలో...
ఠాప్...ఠాప్....ఠాప్.....ఠాప్.....?
కట్ చేస్తే....
మంచం మీద నేను..మంచం పక్కన పిల్లలూ
నా పక్కన మావారు.. చేతిలో బర్నాల్....
ముఖం మీద, చేతుల మీద ఆయిల్ చెదిరి
కాలిన బొబ్బలపై బర్నాల్ రాస్తూ.. ఏమోయ్...
Half lost may also be lost forever.
ఇదెందుకో నీకు కలసి రాలేదు.
మనం హోం ఫుడ్స్ నుండి తెచ్చుకుందామ్లే..
అయినా.. నా హెల్మెట్, నీ కిచెన్ గ్లవ్స్
వేసుకో లేక పోయావా ?

సమ్..క్రాంతి.

2010-01-14T16:15:00.004+05:30

సంక్రాంతి వచ్చిందంటే...నాకు రెండు టెంషన్లు...
ఒకటి పండగదైతే..మరోటి..ఇంతకంటే ఎక్కువది..
ఈ నెలలోనే వచ్చేది...మా అమ్మాయి
యమున పుట్టిన రోజు.
తను చేసే హడావిడి అంతా ఇంతా కాదు.
కాలి గోళ్ళ రంగు దగ్గర నుండి నెత్తి మీద పెట్టుకునే క్లిప్పు వరకూ
కనీసం పది షాపులు తిరగాల్సిందే..
ఈ పండగకి షాపులు ఎంత రద్దీగా ఉంటాయో తెలుసుకదా..
24 న పుట్టిన రోజు కదమ్మా..పండగ అయిపోయాకా వెళదామే అంటే
"పండగ అయిపోతే వెరైటీ లుండవ్...
ఇప్పుడే షాపింగు చేయాలి..అంతే
సరే కదాని ముందే కొంటే అవన్నీ పండగకి వాడేస్తాది.
మళ్ళీ పుట్టిన రోజుకి అన్నీ కొనాల్సిందే.
తను ఏదైన అంది అంటే అది జరగాల్సిందే..
లేకపోతే ఇల్లు పీకి పందిరివేసేస్తాది.
ఎపుడైనా ఏమైన అంటే చాలు... ఏ గదిలోకో వెళ్ళి కామ్ గా
మా ఆడపడుచుకి ఫోన్ చేసేస్తాది.
తనంటే మా ఆడపడుచుకి బాగా గారం.
ఆపై మా అత్తగారు.. ఇంట్లో ఉండనే ఉన్నారు.
ఇక వెంటనే ఫోను వచ్చేస్తాది. " ఎందుకొదినా..ఈ సారికి దానిష్టప్రకారమే
కానీయరాదూ.." అంటూ (ఎపుడూ దానిష్టప్రకారమే అన్నీజరుగుతాయి).

ఇక ఈ సం.రం. పుట్టిన రోజు టెంషను గత సం.రమే మొదలయింది.
ఎందుకంటే ఈ సం.రం.తన పుట్టిన రోజు 24 ఆదివారం వచ్చింది.
లాస్ట్ ఇయర్ అంతా గుర్తుకొచ్చినపుడల్లా మాబుర్ర తినీసేది.
పోని తిధుల ప్రకారం చేద్దామంటే 20 న వచ్చింది.
ఆ రోజు స్కూలు శెలవు. ఆమరుసటి రోజు నుంచి స్కూళ్ళు తెరుస్తారు.
ఇహ తన బాధ అంతా ఇంతా కాదు.
' ఇంక నేను కేకు ఎలా కట్ చేస్తాను.
చాకలైట్సు ఎవరికి ఇవ్వాలి ?
మా ఫ్రండ్స్ ఎవరూ ఉండరు'. ఒహటే ఆందోళన.
సరే ఇంత బాధ పడుతుంది కదాని..మేం బాధ పడి పోయి
ఎలాగోలా ఏదో చేయాలని అనుకుని.. నిన్న షాపింగుకి తీసుకెళ్ళాం.

తనకి CMR షాపింగు మాల్ అంటే ఇష్టం.
ఎందుకంటే అన్నీ ఒకే చోట దొరుకుతాయి.
మీరు నమ్మరు గాని మధ్యాహ్నం రెండు గంటలకు క్లోత్స్ సెక్షనులో అడుగెట్టాం.
బయటకొచ్చేసరికి రాత్రి తొమ్మిదయింది. తన డ్రస్ కొనే కౌంటర్ లో
నలుగురు సేల్స్ గాల్స్ దీని సెలెక్షన్ ధాటికి తట్టుకోలేక
మెల్లగా సైడై పోయారు. ఒక ఇరవయ్ రెండు డ్రస్ లు మాత్రమే ట్రైల్ వేసిందంతే..
చివరికి తేల్చిందేమంటే..... ' ఇది నాన్నగారికి నచ్చింది..
ఇది అమ్మకి నచ్చింది...ఇది నాకు నచ్చింది.
సో మూడు తీసేసుకుంటాను'...
ఢాఢాఢాం .
ఏదో ఉన్న వాళ్ళమే కాని మరీ...ఒక రోజుకి
మూడు డ్రస్ లు కొనేంత రిచ్ కాదు.
తరువాత బంగారం..కొనాలి. డ్రస్ ల దగ్గర అనుభవం
అయిందికదా..అందుకని తనని, మావారిని
ఫుడ్ కోర్టుకి వెళ్ళమని ఆ పని తొందరగా కానిచ్చేసాను.
ఈ గోల్డ్ సర్ప్రైజ్ గా ఇద్దామని ముందే డిసైడ్ అయ్యాం.
షాపింగుకి వచ్చామంటే కంపల్సరీగా హోటల్లో
డిన్నర్ చేయాల్సిందే..లేక పోతే అదో పేచీ..
ఇంటికొచ్చేసరికి పదిన్నర...సెలవులు కదా..
మా బాలు రెచ్చిపోయి టి.వి చూసేస్తున్నాడు.
యమున ఊరికనే ఉండదుకదా......
" ఒరేయ్ అన్నయ్యా... నా బడ్డేకి మూడు డ్రస్ లు
తెచ్చుకున్నాన్రా!చూడు ఎంత బాగున్నాయో..
ఛీ..ఛీ ఇవేం బాగున్నాయ్..
హె ! చెత్త సెలక్షన్.. పరమ చెత్త సెలక్షన్...!
(మేం హోటల్లో తినివచ్చాం కదాని వాడికి కుళ్ళు)
ఢాఢాఢాఢాఢాం...అది నాకేసి
కొర కొరా చూస్తోందంటే....
మళ్ళీ కధ మొదలవుతాది..

కొసమెరుపు:

CMR షాపింగ్ మాల్ లో ఏది కొన్నా బిల్ చూపిస్తే
దాదాపు 100 నుండి 150 రూపాయిల విలువ చేసే
తాజా కూరగాయలిస్తున్నారండోయ్..
త్వరపడండి. ఇదే సమ్..క్రాంతి.
బ్లాగ్మిత్రులందరికీ
సంక్రాంతి శుభాకాంక్షలు.

భోగి పిడకలంటే తెల్సా?

2010-01-13T13:57:00.004+05:30

ఊరు నించి రాత్రే వచ్చాం. ఉదయాన్నే పిల్లల్ని లేపి స్నానాలు చేయించే సరికి
ఎదురు ఫ్లాట్ సరిత గారు కాలింగ్ బెల్ కొట్టి ...
ఏవిటి మీరు రారా ? భోగి మంట వేస్తున్నాం. బాబుని, పాపని తీసుకుని రండి.
అని పిలిచేసి వెళ్ళి పోయారు.
మా ఆడపడుచు అత్తగారికి బాగాలేదంటే విజయవాడ వెళ్ళి రాత్రే వచ్చాం.
సంక్రాంతికి ఏం ఎరేంజ్ మెంట్స్ చేసారో తెలియదు.
పిల్లలిద్దరిని ముందు పంపి తరువాత నేను వెళ్ళాను.
నాలుగున్నరకే చాలమంది అక్కడకి చేరిపోయారు.
మైన్ గేటు కి కొంచెం పక్కగా పెద్ద భోగి మంట వేసారు.
ఇలాటి కార్యక్రమాలంటే ముందుండే మూర్తి గారు నన్ను చూడగానే..
ఏమ్మా ఎపుడొచ్చారు. మీ పిన్నిగారు బాగున్నారా?
ఆ! రాత్రే వచ్చాం అంకుల్. పిన్నికి ఫర్వాలేదంకుల్. కొంచెం లేచి తిరుగుతున్నారు.

భోగి మంట పెద్దదే వేసారు. చుట్టూ చేరిన పిల్లలు చిన్న చిన్న పుల్లముక్కలు తీసుకొచ్చి మంటలో పడేస్తున్నారు.
అంతే కాని ఎవరి చేతుల్లోను భోగి దండలు గాని భోగి పిడకలు గాని లేవు.
ధగ ధగ మండుతున్న భోగి మంటని చూసేసరికి
నా చిన్నప్పటి జ్ఞాపకాలు ముసురుకొచ్చాయి.
మాది అటు పల్లెటూరు కాదు పట్నం కాదన్నట్లుండే ఊరు. పల్లె పండుగలు, సాంప్రదాయాలకు విలువనిస్తూ, పట్టణ నాగరికతకి స్వాగతం పలికే సంధికాలమ్లో నలుగురు అన్నయ్యలు,
ఒక అక్క కి ఒకే ఒక చెల్లి గా పుట్టిన అదృష్టవంతురాలిని.
సంక్రాంతి వచ్చిందంటే ముగ్గుల పుస్తకాలు ఫ్రెండ్స్ షేర్ చేసుకుని రకరకాల ముగ్గులు ప్రాక్టీసు చేస్తూ ఆ సందడే సందడి. నేనింకా చిన్న పిల్లని కాబట్టి అక్క చేస్తుంటే వింతగా చూసేదాన్ని. అందరికంటే చిన్నదాన్నికాబట్టి అందరూ గారంగా చూసుకునేవారు.
ఇహ భోగి పిడకలు గురించి చెప్పాలంటే...చాలాఉంది.
సంక్రంతి వస్తుందంటే నెల రోజుల ముందే అమ్మ పొలం నుండి ఆవు పేడ తెప్పించేది. మా నలుగురు అన్నయ్యలు వాటితో భోగి పిడకలు చేసేవారు. ఒక్కక్కరికి ఒకో దండ వచ్చేటట్టు చిన్ని చిన్ని పిడకలు
వేసి వాటి కి దండగా చేయడానికి చిన్ని కన్నాలు పెట్టేవారు.
మా ఆరుగురికి ఒకో దండ వచ్చేటట్టు చేసేవారు. ఈ పిడకలలో రకాలుండేవండోయ్.
అరిసె పిడకలు అంటే అరిసెల్లా పెద్దవి చేసి ఎక్కువ కన్నాలు పెట్టేవారు.
అరటికాయ పిడకలు అంటే అరటికాయ షేపులో ఉండేవి.
ఇవి అందరకీ సమంగా వేసి భోగి దండలోమధ్య మధ్యలో వేస్తే దండలెంత
అందంగా ఉండేవో.మిగిలినవి చిన్నగా హార్లిక్స్ బాటిల్ మూతంత సైజులో గుండ్రంగా ఉండేవి.
నిజం చెప్పొద్దూ పేడ పిడక దండలైనా గాని ఎంత ముద్దొచ్చేవో..
ఈ పిడకల తయారీలో చిన్న పిల్లని కాబట్టి నన్ను దగ్గరికి రానిచ్చేవారు కాదు.
నాకు మాత్రం అవి ఎప్పుడెండుతాయా అని ఒకటే టెంషన్.
ఎప్పుడు దండలు చేస్తారో అవి ఎంత అందంగా ఉంటాయో
ఊహించుకుంటూ ఆనంద పడి పోయేదాన్ని.అన్నయ వాళ్ళు స్కూలు కెళ్ళినపుడు
మెల్లగా గోడ దగ్గరికి చేరి పిడకలు ఎండాయా లేదా అని ఊడపెరికి చూసేదాన్ని.
అంతేఊడిన పిడకలని అతికించలేం కదా..
సాయంత్రం వాళ్ళు స్కూలు నుండి వచ్చేసరికి వరుసకి నాలుగైదు పిడకలు మిస్సింగ్.
రెండో అన్నయ్య కి నాకు ఎప్పుడూ గొడవే. అంతే అమ్మకి కంప్లైంటు వెళ్ళి పోయేది.
అమ్మ నను కొట్టడానికి, రెండో అన్నయ్య నను పట్టుకోవడం ఇల్లంతా పరుగు పెట్టించి పెట్టించి
చివరకి నాయినమ్మ వెనక్కి దాక్కునేదాన్ని. నాయినమ్మ వాణ్ణి ఒక్క గసురు గసిరేది.
దానికి అందేలా పిడకలు ఎందుకేయాలి?
కొంచెం ఎత్తులో వేయాలని తెలియదా మీకు ? అని తిట్టేది. దాంతో సద్దుమణిగేది.
మళ్ళీ పెద్దన్నయ్య కొత్త పిడకలు వేయడం.. వాటిని నేను చెకింగ్ చేయడం
ఈ గొడవ ఇంచుమించు రోజూ జరుగుతూనే ఉండేది.

ఇపుడు తలుచు కుంటుంటే నవ్వొస్తోంది.
ఇన్ని సరదాల మధ్య నిమ్మదిగా నడుచుకుంటూ
వచ్చిన గంగిరెద్దులా భోగి పండగ వచ్చేది.
ఉదయాన్నే అందరికి స్నానాలు చేయించి కొత్త బట్టలు కట్టుకుని
ఆరుగురుం కవాతు చేసే సైనికుల్లా ఒకరి వెనక ఒకరు భోగి మంట్లో
భోగిదండలు వేసాకా నాన్న భోగి మంట బూడిద
తీసి అందరకి వీబూధి పెట్టేవారు.
అక్క వాళ్ళ ఫ్రెండ్స్ భోగి మంట చుట్టూ తిరుగుతూ పాటలు పాడేవారు.
అమ్మ అక్కని అటువంటి ఆటపాటలకి పంపేది కాదు.
ఇంట్లో ఉన్న అమ్మకీ నాయినమ్మకీ భోగి బూడిద పెద్దన్నయ తీసుకొచ్చే వాడు.
ఇంటికొచ్చేసరికి వేడి వేడిగా టిఫిన్ రెడీ గా ఉండేది.
ఇవండీ నా చిన్నప్పటి భోగి స్మృతులు.
ఇప్పటికీ ఈ రకంగా పల్లెటూరు లో జరుగుతున్నాయి తప్ప
ఈ నగరాలు ఈ సంబరాలకి నోచుకోలేదు.
ఈ మధ్య ఎక్కడో చదివాను. ఈ తరం వారు
ఈ సంక్రాంతి సంబరాల గురించి తెలుసుకోవాలంటే
www.సంక్రాంతి.com లో చూడాల్సిందేనట.

అదే చిరునవ్వుతో....

2010-01-12T06:03:00.006+05:30

అందమైన పూల పానుపు పై
నీ అంతిమ దృశ్యాలు
నాలో ఘనీభవిస్తూంటాయి...
అవసరం తీరిపోయింది కదా
అందరూ తొందర పడి
నిను సాగనంపేసారు
ఎవరూ మిగలలేదు
మనిద్దరం తప్ప...

నువు లేవన్నది
ఎంత అబధ్ధమో
నేను ఉన్నాను అన్నదీ
అంతే అబధ్ధం..

నీ సమాధి మీద
మన పాప నాటిన
తులసి మొక్క
నన్నే చూస్తున్నట్లు ఉంది.
అవును నిజమే
నాకు కనిపిస్తున్నావు
నన్ను రమ్మంటున్నావు
నేను నడుస్తున్నానా !
నాకే తెలియదు..
నాలో నేను లేను
గుప్పెడు సముద్రాన్ని నింపి
నానుండి నన్ను
నువెపుడో తీసుకు పోయావు.
గది నిండా నీ స్మృతులే
కిటికీ తెరచి చూస్తే
అంతా చీకటి..
నీ చిత్తరువు మాత్రం
అదే చిరునవ్వుతో....

పెళ్ళి పుస్తకం - 12

2010-01-03T22:45:00.008+05:30

హిందూ వివాహ ప్రాశస్త్యము.
పండ్రెండవ భాగము

పాణి గ్రహణము:

బ్రహ్మముడి తంతు లోని మరికొన్ని మంత్రాలు తెలుసుకుందాం....

1.సోమ: ప్రధమో వివిదే గంధర్వోవివిద ఉత్తర:
తృతీయో అగ్నిష్టేపతి స్తురీయస్తే మనుష్యజా:

2.సోమో దద ద్గంధర్వాయ గంధర్వో దద దగ్నయే
రయిం చ పుత్రాగ్ శ్చాదా దగ్ని ర్మహ్యా మధో ఇమామ్.

1. కన్య పుట్టగానే కొంత కాలము సోముడు,కొంతకాలము గంధర్వుడు,
కొంతకాలము అగ్ని కాపాడుతారు. వారిని హోమ ప్రార్ధనాదుల గావించి
సంతృప్తి పరచి వారివలన పొందిన కన్యకు తాను పతి యగును.

2. సోముడు నిను గంధర్వుని కిచ్చెను, గంధర్వుడు నిన్ను అగ్ని కిచ్చెను.
నేను నిన్ను కాపాడవలసిన నాల్గవ వాడను. అగ్ని నాకు నిన్ను,
పుత్రులను ప్రసాదించుగాక.
అని అభి మంత్రించి పెళ్ళికూతురు చేయి పట్టుకొంటాడు.
దీనినే పాణిగ్రహణము అంటారు.
ఇక్కడ ప్రధాన మైన రెండు మంత్రాలను,వాటి అర్ధాలను చూద్దాం.

'గృహ్ణామితే సుప్రజాస్త్వాయ హస్తం
మయావత్య జరదృష్టిర్య దాసహ'

పెద్దలు ఎట్లు ఆచరించిరో అట్లే నేనునూ మంచి సంతతి కొరకు
నీ హస్తమును గ్రహించుచున్నాను.

'మూర్దన్వాన్ యత్రసౌభ్రవ:పూర్వ దేవేధ్య ఆతపత్
సరస్వతి ప్రేమదన సుషగే వాజినీవతి'

మన పూర్వులగు సుభ్రులు శిరోధార్యమగు శీలముతో ఎట్లు వెలుగొందిరో
అట్లు వెలుగొందునట్లు ఈమెను సరస్వతి లోకములోని జీవులకు
అగ్రగణ్యగా నిన్ను చేయు గాక ! అని వరుడు మంత్రాలు పఠిస్తాడు.

సప్తపది:

అంటే వరుడు వధువుని చేయి పట్టుకుని అగ్ని హూత్రము
చుట్టూ ఏడు అడుగలు వేస్తాడు.
ఈ ఏడడుగులలోను వరుడు వధువుని ఏడు కోరికలు కోరతాడు.
ఈ ఏడడుగులు ఏడేడు జన్మల అనుబంధాన్నిస్తుంది.
ఈ ఏడడుగులకు ఏడు మంత్రాలను పఠిస్తాడు.
ఈ సప్తపది పూర్తి కాని ఎడల వివాహము పూర్తి కానట్లే...

అగ్నికి ఉత్తరం వైపున కుడికాలు మొదట పెట్టి ప్రాద్దిక్కుగా గాని
ఉత్తర దిక్కుగా గాని వధువుని నడిపించుచూ ఏడు మంత్రాలు
చెపుతాడు.

1. ఏకమిషే విష్ణు స్త్వాన్వేతు
2. ద్వే ఊర్జే విష్ణు స్త్వాన్వేతు
3. త్రీణి వ్రతాయ విష్ణు స్త్వాన్వేతు
4. చత్వారి మయోభవాయ విష్ణు స్త్వాన్వేతు
5. పంచ్వశుభ్యో విష్ణు స్త్వాన్వేతు
6. షడృతుభ్యో విష్ణు స్త్వాన్వేతు
7. సప్తభ్యోత్రాభ్యో విష్ణు స్త్వాన్వేతు

భావం:

ఓ చిన్నదానా ! నీవు నావెంట నడువుము
విష్ణుమూర్తి నీవు వేసే....
మొదటి అడుగువల్ల అన్నాన్ని,
రెండవ అడుగువల్ల బలాన్ని,
మూడవ అడుగువల్ల మంచి కార్యాలను,
నాల్గవ అడుగువల్ల సౌఖ్యాన్ని,
ఐదవ అడుగువల్ల పశుసమృధ్ధిని,
ఆరవ అడుగువల్ల ఋతుసంపదను,
ఏడవ అడుగువల్ల ఏడుగురు హోతలను
నీకు ఇచ్చుగాక.

ఇవికాక వరుడు కొన్ని మంత్రాలను,
వధువు కొన్ని మంత్రాలను, ఇరువురు కలసి
కొన్ని మంత్రాలను పఠిస్తారు.
ఇవి భార్యా భర్తల అనుబంధాన్ని,భాద్యతలను వివరిస్తాయి.
అవి తరువాయి టపాలో....

కొసమెరుపు:
1. దక్షిణాఫ్రికాలోని కొన్ని జాతులలో వివాహ వేడుకలలోభాగంగా... వారి జీవితాలలో ముఖ్యమైనవిగా భావించే 12 వస్తువులని (ద్రాక్ష సారాయి,గోధుమలు,మిరియాలు, ఉప్పు, చేదు రుచినిచ్చే కొన్ని మొక్కలు,నీటి కుండ,చెంచా, చీపురు,తేనె, ఒక వ్యవసాయ పనిముట్టు, ఒక రక్షణ కవచం, బైబిల్ పుస్తకం) వివాహ తంతులోఉంచుతారు. వధూవరుల రెండు కుటుంబాల ప్రేమానురాగాలకు ప్రతీకలుగా వీటిని భావిస్తారు.

2. మరికొన్ని జాతులలో వధూవరుల తల్లిదండ్రులు వారివారి ఇళ్ళనుండి కొలిమిలోని అగ్నితో వధూవరుల గృహం లో కొలిమి ని వెలిగిస్తారు.

2009-2010 ఒక విచిత్రం.

2010-01-01T18:32:00.006+05:30

బ్లాగ్మిత్రులందరికీ
నూతనసంవత్సర శుభాకాంక్షలు

మనం మరో 1000 సంవత్సరాలు బ్రతికితే
3009-3010 చూడగలం.

ఇది అసంభవం కదా

ఇలా మొదటి దశాబ్దం చూడడం ధ్రిల్లింగా లేదూ...........

ఎందుకని...?

2009-12-29T05:12:00.005+05:30

ఈ బాధని, వేదనని
ఎందుకు నింపుతావు నాలో
నన్ను నీలో ఎపుడో వంపుకున్నానే..

ఎందుకు నాకళ్ళని వర్షిస్తావు
నీ విరహపుటెడారులు నాలో
విహరిస్తున్నయనా

క్షమించు ప్రియా నిను
ప్రేమిస్తున్నానని అనలేను
ఎందుకంటే..అది
నీకు తెలియంది కాదు..

నిను చుంబించానని అనలేను
ఎందుకంటే..
చూడలేనంతగా నాకళ్ళు
మూతలు పడిపోయాయి.

నాకు తెల్సు
నను పొగడ్తలలో
ముంచెత్తినపుడు
నిజం చెప్పటం లేదని..

అయ్యో..
నీ తలపుల్లో
కాలం వేలి కొనలనుండి
జారి పోయిందే....

విడిపోదామనుకునే కొలదీ
బలపడి పోతూంది.
ఎందుకంటే..
నన్ను నీలో ఎపుడో వంపుకున్నానే...

పెళ్ళి పుస్తకం - 11

2009-12-22T05:01:00.005+05:30

హిందూ వివాహ ప్రాశస్త్యము
పదకొండవ భాగము

తలంబ్రాలు:

పెళ్ళిళ్ళలో చిన్నలకు పెద్దలకు వేడుకగా కనపడే
తలంబ్రాలు కార్యక్రమం వెనుక ఎంత రహస్యం దాగి ఉందో
అప్పుడు చెప్పే మంత్రాలను చూస్తే మనకు తెలుస్తుంది.

తలంబ్రాలు పోసుకునేటప్పుడు వరుడు ఈ క్రింది మంత్రం చెప్పి
ముందు వధువు నెత్తిపై తలంబ్రాలు పోస్తాడు.

1. " ప్రజావే కామస్స వృధ్యతాం "
' నేను కోరిన సంతానము సమృధ్ధిగా నుండుగాక '

తరువాత వధువు ఈ క్రింది మంత్రాలు చెప్పి వరుని నెత్తిపై
తలంబ్రాలు పోస్తుంది.

2. " పశవో మే కామస్స మృధ్యతాం "
' నాకిష్టమైన పాడి పంటలు సమృధ్ధిగా నుండుగాక '

వరుడు ఈ క్రింది మంత్రాన్ని చెప్పి వధువు నెత్తిపై
రెండవ సారి తలంబ్రాలు పోస్తాడు.

3. " యజ్ఞోమే కామస్సమృధ్యతాం "
' నాకిష్టమయిన త్యాగం సమృధ్ధిగా నుండుగాక '

తరువాత ఇద్దరూ ఈ క్రింది మంత్రం చెప్పి తలంబ్రాలు
పోసుకుంటారు.

4. " శ్రియోమే కామస్సమృధ్యతాం "
' మాకు కావల సిన ధనం సమృధ్ధిగా నుండుగాక '

బ్రహ్మగ్రంధ్రి లేదా బ్రహ్మముడి :

హోమసమయమ్లో దంపతులిరువురు విడిపోకుండాను,
దూరం కాకుండాను పురోహితుడు ఇరువురి కొంగులను ముడి వేస్తూ
ఈ మంత్రమును చదువుతాడు.

" ధృవంతే రాజ వరుణో ధ్రువంతెనో బృహస్పథి:
ధ్రువంచ ఇంద్రశ్చాగ్నిశ్చ రాష్ట్ర ధారయతాంధ్రువం "

ఈ దాంపత్య సామ్రాజ్యమును ధరించునట్టి మీకు రాజగు
వరుణుడు,దేవుడగు బృహస్పతి, ఇంద్రుడు
అగ్ని స్థ్రిరత్వమును కలుగుజేయుదురుగాక!

" గృహ పత్నీ హధా సోవశినీత్వం విదధం ఆవదాసి "

' ఇంటి యజమానురాలుగా సర్వమునకు పెత్తనము వహించి
తీర్చిదిద్దుకొను దానవుగా ఇంటికి రమ్ము '
అని వరుడు వధువు చేయి పట్టుకొం టాడు.

పాణి గ్రహణము మరో టపాలో

కొసమెరుపు:
1. Women are unpredictable. Before marriage,

she expects a man, after marriage she suspects

him, and after death she respects him.

2. "What's the matter, you look depressed."

"I'm having trouble with my wife."

"What happened?" "She said she wasn't

going to speak to me for 30 days.

" But that ought to make you happy."

"It did, but today is the last day."

పెళ్ళిపుస్తకం-10

2009-12-20T05:30:00.007+05:30

హిందూ వివాహ ప్రాశస్త్యము
పదవ భాగము

బండికాడి:

దీనికొక కధ ఉంది. అపాల అను ఒక అవివాహిత
యువతికి వళ్ళంతా బొల్లి వ్యాధి వచ్చి ఎవరూ
వివాహము చేసికొనలేదు. ఇంద్రుని గూర్చి యాగము చేసిన
అది తగ్గి పోవును. కాని వివాహము కానిది ఆ యాగము
చేయరాదు. అందుకు ఆమె విచారించుచు ఒక నదిలో
స్నానము చేయుచూ - ప్రవాహమున కొట్టుకొని
పోవుచుండగా సోమలత ఒకటి ఆమె దగ్గరికి కొట్టుకుని
వచ్చింది. ఆమె దానిని పళ్ళతో నమిలి ఇంద్రుని ఉద్దేశించి
నోటితో విడిచి పెట్టింది.
ఇంద్రుడు ఆ రసమును గ్రహించి జలమును తన రధము కాడి
రంధ్రము గుండా పోనిచ్చి ఆ జలమును ఆమెపై చల్లుతాడు.
రోగవిముక్తురాలైన ఆమెకు సూర్య వర్చస్సు వస్తుంది.
ఈ సంప్రదాయం లో
ఉత్తర దక్షిణముగా కాడిని పట్టుకొంటారు.
దక్షిణమున ఉన్న రంధ్రము గుండా వరుడు
నీటిని చల్లుతాడు. ఈ పవిత్ర జలములచే
వధువు పవిత్ర రాలగుతుంది.

"అవీరఘీ: ఉదచంతు అత:"

వీరులైన సంతతికి అరిస్టము కులుగకుండ
ఈ జలములు క్షాళనముచేయు గాక !

"ఖేఅనవ: ఖేరద: ఖేయుగస్య శచీపతే
అఫాలాం ఇంద్రత్రి: పూర్త్యకరత్ సూర్యవర్చసవ "

గగనమున పోల్చలేని రధమును నడుపు ఓ శచీపతి!
అపాలా(ఎవరి పాలనలో లేని) అయిన ఈమెను సూర్యుని
తేజస్సుగల దానినిగా మూడు మార్లు చేయుగాక.
తరువాత కాడి రంధ్రము గుండా బంగారము
(మంగళ సూత్రము) పోనిచ్చి నీరు చల్లుతూ

"శనై హిరణ్యం సము వంతు ఆప:
శనై మేధ భవంతు"

బంగారు వెలుగులు మెల్లగా జలమును
చేరి సారవంతముగాక .
మిగతా మంత్రములు వధువుని నూరు రెట్లు
పవిత్రురాలగుటకు, శాంతి నివ్వగలందులకు చెప్పును.

యోక్త్ర ధారణ : ( వధువును త్రాటితో చుట్టుట )

"ఆశాసానా సౌమనసం ప్రణాం సౌభాగ్యం తనుం
అగ్నే రనూరతా భూత్వాసన్న హ్యేనుకృతాయకం"

మచి మనస్సును, మంచి సంతతిని, సౌభాగ్యాన్ని
మంచి తనువును కలిగి ఉండి అగ్నిహోత్రమున
నాకు సహచారిణివై సత్కా ర్య ములకు సంసిధ్ధువు కమ్ము.

మంగళ సూత్రధారణ:

వరుడు సంకల్పించి మాంగళ్యదేవతను ఆహ్వానించి
షోడశోపచారాలతో మంగళసూత్రమును పూజించును.
సభలోని వారిచే దానిని సృశింప చేస్తారు.
తరువాత వరుడు ఈ మంత్రం
చెపుతూ సూత్రమును కట్టును.

"మాంగళ్యం తంతునానేన మమజీవన హేతునా
కంఠే బధ్నామి శుభగేత్వం జీవ శరదశ్శతం "

నా జీవనమునకు హేతువైన ఈ సూత్రము
చేత నేను కంఠమున మాంగల్యమును కట్టుచున్నాను.
నూరు సం వత్సరములు జీవించుము.

తలంబ్రాలు మరో టపాలో.......

కొసమెరుపు:
1. In the first year of marriage,
the man speaks and the woman listens.
In the second year, the woman speaks and the man listens.
In the third year, they both speak and the neighbors listen.

2. Love is blind but marriage is an eye-opener.

అసలు కెసిఆర్ తెలంగాణా వాడేనా ?

2009-12-15T06:21:00.003+05:30

నాబ్లాగులో అసలు రాజకీయాలగురించి చర్చించకూడదనుకున్నాను.
కాని వేడెక్కుతున్న రాజకీయ వాతావరణాన్ని చూస్తుంటే
ఒక తెలుగుజాతి బిడ్డగా
నాకు తెలిసిన విషయాలను ప్రస్తావించడం నా కనీస ధర్మం అనిపించిది.

ఒక పార్టీలో తన అస్ఠిత్వాన్ని ఉనికిని కోల్పోయి తన
స్వార్ధ ప్రయోజనాల కోసం తె.రా.స.అనే ముసుగేసుకుని 2001 ఏప్రిల్ 27 న
ప్రజలలో లేని ఉద్యమ స్ఫూర్తి ని(1969 లోనే సమసిపోయింది)
రగిలించడానికి వచ్చిన కె.సి.ఆర్ ని పాపం తెలంగాణా ప్రజలు
గుడ్డిగానమ్మి గెలిపించి....మోసపోయి....ఓడించారు.
తెలంగాణా గురించి ఒక్కడుకూడా లేకపొతే ఎలా
అని సానుభూతి చూపించి బొటాబొటి మార్కులతో పాస్ చేసారు.
తె.రా.సా. రాజకీయ పార్టీ కాదని , ఒక ఉద్యమ పార్టీ అని తనే ప్రకటించుకొన్నాడు.
కానీ ఈ రోజు ఏం జరుగుతున్నదేమిటి? దీనికాయనిచ్చే సమాధానం ఏమిటి?
దేశం లో ఏ పార్టీ కూడా ఒక మేనిఫెస్టో అంటూ లేకుండా గెలిచిన ఏకైక పార్టీ తె.రా.స.
అధికార వ్యామోహమే తప్ప ఒక ఎం.పి. నిధులతో
ఒక్క సామోజిక కార్యక్రమం కూడాచేపట్టలేక పోయాడు.
ఇన్నళ్ళూ తన ఉనికి కోసం పాటుపడ్డమే తప్ప
తెలంగాణా ఉనికి కోసం పాటు పడిన దాఖలాలు లేవు.
ఇన్నయ్య, కెకె మహేంద్ర రెడ్డి, ప్రకాశ్ వంటి మేధావులు, నాయకులు
ఇపుడు కె.సి.ఆర్తో కలిసి ఎందుకు పనిచేయటమ్లేదు ?
ఒక్క జయ శంకర్ తప్ప ఆయనతో ఉన్న మేధావుల జాబితా ఏది?
తన కుటుంబానికి పార్టీతో సంబంధం లేదన్నాడుగా అది నిజమేనా?
ఇప్పుడు తనది కుటుంబ పార్టీ కాదా?
విద్యార్ధులలోకి గూండాలను చొప్పించి ఆంధ్రా ఆస్తుల్ని
ధ్వంశం చేయించిన కెసీఆర్ తినే తిండి ఎక్కడిది?
వెనుకబడి పోయింది అని అంటాడే..
యూనివర్సిటీలు, పరిశ్రమలు, వ్యాపారాలు అన్నీ తెలంగాణాలో ఆయనకు కనబడలేదా?
ఆంధ్రా ప్రాంతం వారు పరిశ్రమలు, వ్యాపారాలు స్థాపించకపోయింటే వీరి పరిస్ఠితి ఏమిటీ?
ఆంధ్రా ప్రాంత ప్రజలు
తెలంగాణా విడిచి వెళ్ళాలని కెసిఆర్ ప్రకటించాడు.

అదే కనక జరగాల్సి వస్తే...

మొదట వెళ్ళాల్సిన వాడు..కె.సి.ఆరే...

ఎందుకంటే ఆయన జన్మ స్ఠలం విజయనగరం జిల్లా.

పెళ్ళి పుస్తకం - 9

2009-12-13T06:38:00.000+05:30

హిందూ వివాహ ప్రాశస్త్యము
తొమ్మిదవ భాగము

వివాహ బంధం నిండు నూరేళ్ళు పవిత్రంగా, అన్యోన్యంగా, ఏ అరమరికలు లేకుండా దంపతులు కలిసిమెలిసి జీవించడానికి తగిన నైతిక పునాదులు ఈ కన్యాదాన తంతులో కనిపిస్తాయి.
ఇక్కడ ప్రతి మంత్రానికి ఒక విశిష్టత ఉంది. వీటి అర్ధాలు తెలుసుకుని జీవించిన నాడు వైవాహిక జీవితంలో ఏ అనర్ధాలు ఉండవు.
కన్యాదానము గుణవంత మగుటకు సాలగ్రామమును దానం చేస్తూ...
కన్యాదాత : "ధర్మేత్వయా ఏషానాతి చరితవ్య"
ధర్మాచరణమున నీవు ఈమెను అతిక్రమించి చరింపరాదు.
వరుడు : "నాతిచరామి". అతిక్రమించి చరించను
క.దా : "అర్ధేత్వయా ఏషానాతి చరితవ్య" అర్ధాచరణమున నీవు ఈమెను
అతిక్రమించి చరించరాదు.
వ. : "నాతిచరామి"
క. దా : "కామేత్వయా ఏషా నాతి చరితవ్య"
కామాచరణమున ఈమెను అతిక్రమించి చరింపరాదు.
వ. : "నాతిచరామి"
ఇది అయిన తరువాత కొంతమంది గోదానము చేస్తారు.
ఇక్కడ కొన్ని మంత్రాలు కూడా చెపుతారు.

శచీ పూజ ఎందుకు ?
సుమూహర్త సమయాన కన్యాదాత శచీదేవిని పూజించుచూ:
"దేవేంద్రాణి నమస్తుభ్యం
దేవేంద్ర ప్రియభామినివివాహం,
భాగ్యమారోగ్యం పుత్రలాభం చ దేహిమే"
దేవేంద్రుని ప్రియురాలవగు నీకు నమస్కారము.
వీరికి వివాహము, భాగ్యము, ఆరోగ్యము,
సంతతి కలిగింపుము. అని ప్రార్ధించును.
తరువాత వధువును తెరకు తూర్పున పశ్చిమ ముఖంగా కూర్చోబెట్టి
వరుని తెరకు పశ్చిమమున కూర్చోబెట్టి ఇరువురికి మధ్యవున్న తెరను
తొలగిస్తారు.
అపుడు వధూవరులు ఒకరి భ్రూమధ్యము మరియొకరు చూసుకుని
జీలకర్ర బెల్లమును ఒకరి నెత్తిన మరియొకరు ఉంచుతారు. వరుడు ఈ
మంత్రములు చెపుతాడు.
"ఆభ్రాతృఘ్నీం వరుణ అపతిఘ్నీం బృహస్పతే
ఇంత్ర అపుత్రఘ్నీం లక్ష్యం తామప్యై సవితస్స :"
ఈమె సోదరులకు వృధ్ధికలగాలని వరుణుణ్ణి, లక్ష్మిని,
భర్త వృధ్ధిపొందుటకు బృహస్పతినీ
ఈమెకు పుత్రసంతానము కలదానినిగాచేయుటకు
ఇంద్రుణ్ణి ప్రార్ధిస్తాడు.
"అఘోరచక్షు: అవతిఘ్నీయేది"
శుభదృష్టి కలదానవుగాను, సౌభాగ్యవతిగాను వర్ధిల్లుము.
"శివా పశుభ్య: సుమనా: సువర్చాహా:
మన పశు సంపదకు శుభములు కలుగునట్లుగా మంచి
మనస్సుతో తేజస్సుతో వర్ధిల్లుము.
"వీరనూ: దేవకామాస్యోన శంనోభవత్ ద్విపదే శంచతుష్పదే"
వీరులగు పుత్రులను కాంచుము. దేవతలు ముచ్చటపడునట్లు
మెలగుము. మనకు మనపరివారమునకు, మన పశువులకు
శాంతి కలుగు గాక.
వరపూజ, కన్యాదానము, శచీపూజ తంతులు పూర్తయిన తర్వాత
కొన్ని ప్రాంతాలలో, కొన్ని వర్ణాలలో కాడి (రెండుఎడ్ల బండికి రెండు ఎద్దులను కలుపుతూ
వాటి మెడమీద వుండే పొడవైన కర్ర దూలము ) రంధ్రము నుండి జలమును చల్లి
మరికొన్ని మంత్రాలను పఠిస్తారు.
అవి మరో టపాలో....
కొసమెరుపు:
1. A woman worries about the future until she gets a husband. A man never worries about his future until he gets a wife!

2. When a man opens the door of his car for his wife, you can be sure of one thing: either the car is new or the wife.

పెళ్ళి పుస్తకం - 8 (కన్యాదానము)

2009-12-09T22:36:00.000+05:30

హిందూ వివాహ ప్రాశస్త్యము
ఎనిమిదవ భాగము
వివాహ విధానం లో అతి ముఖ్యమయినది కన్యాదానము.
ఎన్నో సం.రాలుగా ప్రేమ,మమకారాలతో పెంచుకున్న
కూతురుని ఈ ప్రక్రియతో వరునికి,
అతని కుటుంబానికి
సుఖసౌఖ్యాలను అందించాలనీ, వంశాభివృధ్ధి గావించాలని
సాక్షాత్ లక్ష్మీ సమానురాలైన కన్యని దానం చేయడం జరుగుతుంది.
కన్యాదానము చేయునపుడు కన్యాదాత కొన్ని మంత్రాలను చెపుతాడు.
అష్ట వర్షకన్యా పుత్రవత్పాలితామయా
ఇదానీం తవదాస్యామి దత్తాం స్నేహేన పాలయ II
పుత్రునితో సమానముగా పెంచబడిన ' 8 సం.ల వయస్సు గల
ఈ కన్యను నీకిచ్చుచున్నాను. నీవు ఈమెను
ప్రేమాభిమానాలతో కాపాడుము.
ఇక్కడ ఒక విషయాన్ని గమనించాలి.
అమ్మాయి కి 8 సం.రాల వయస్సు వచ్చినంతనే ఆమె
కన్యగా పరిగణించ బడుతుందనీ. ఈ వయస్సు వచ్చునాటికి
కన్యాదానము జరగాలని, మనుధర్మశాస్త్రం చెపుతుంది.
కన్యానం కనక సంపన్నాం కనకాభరణ భూషితాం II
దాస్యామి విష్టవే తుభ్యం బ్రహ్మలోక జగీషియాII
బ్రహ్మలోకమును సాధించుట కొరకు, సువర్ణ సంపద గలదియు,
సువర్ణాభరణములచే అలంకరింపబడినదియు
అగు ఈ కన్యను సాక్షాత్ విష్ణు స్వరూపుడగు
నీకు ఇచ్చుచున్నాను.
విశ్వంభర: సర్వభూతా: సాక్షిణ్య: సర్వదేవతా:
ప్రదా స్యామి పితృణాం తారణాయవై.
దైవము, పంచభూతములు, సమస్త దేవతల సాక్షిగా
పితరులు తరించుటకు ఈ కన్యను దానము చేయుచున్నాను.
కన్యాం సాలంకృతాం సాధ్వీం. సుశీలాచ,సుధీమతే
ప్రయతోహ్నం ప్రయ చ్చామి ధర్మకామార్ధ సిధ్ధయే II
అలంకారములతో కూడినదియు, సాధుశీలయగు
ఈ కన్యను ధర్మకామార్ధ సిధ్ధి కొరకు పూనుకొని నేను ఈ సుశీలుడగు
బుధ్ధిమంతునుని దానము చేయుచున్నాను.
తుభ్యం ప్రజా సహత్వ ధరంభ్య: ప్రతిపాదయామి
సంతతి ని పొందుటకు, కర్మలకొరకు నీకు ఈ కన్యను నియమించుచున్నాను.
కావున వృణీధ్వం వరింపవలసింది. వృణీమహే: వరించుచున్నాను. అని వరుడు బదులు పలుకుతాడు.
వయోదాత్రే మయోమహ్యం అస్తుప్రతిగృహుత్వే
కన్యనిచ్చిన ఈ దాతకును, స్వీకరించిన నాకును బాంధవ్యము కలుగుగాక.

కన్యాదానమందలి మరిన్ని వివరాలు మరో టపాలో
కొసమెరుపు

Marriage is a three ring circus: engagement ring, wedding ring, suffering.
There are two times a man does'nt understand a woman, before marriage and after marriage!

మరో లోకం లో

2009-11-29T22:34:00.000+05:30

మనం కలిసిన

ఆ మధుర క్షణాలు

ఏ కలలు, కల్పనలు లేని
మరో లోకం లో
మనం మనకోసమే
అనుకున్నాం

ఏదో ఒక రోజు
కాలం ఈ సందేశాన్ని
నీ ముందు నిలబెడుతుంది.
నీవు లేని
నన్నుని చూస్తావు
పుడమి ఎదపై ముద్దాడిన
మన పాదముద్రికలని
నువు చూడకపోవు
పొన్నాయి చెట్టుకింద
నీ వడిలో నానుదుట
రాలిన పూవు
నీ ముద్దుతో
పొందిన అమరత్వాన్ని
నువు గుర్తించకపోవు
మన గుసగుసలు
గాలి వినిపించక పోదు
కిలకిలరావాలలో
పరిమళించిన ఆశలు
వినబడకపోవు

నీ రాకకై ఈ తోట
పూల పానుపు
పరిచింది..
ఒక్క భ్రమరం కోసం
వలపు రంగులద్దుకుని
మత్తుగా నీకోసం
వేచి చూసే వేల సుమాల్లో
నను గుర్తించ గలవా ప్రియా...

పెళ్ళి పుస్తకము -- ఏడవ భాగము

2009-11-23T22:08:00.000+05:30

హిందూ వివాహ ప్రాశస్త్యము.
ఏడవ భాగము
వివాహ మంత్రాల అర్ధము

మరికొన్ని మంత్రాల అర్ధాలను ఇక్కడ చూద్దాం.
వధూవరుల గోత్రాలు తెలిపిన తర్వాత...
" ధర్మప్రజా సంపత్యర్ధం పృణీమహే"
(ధర్మ సంతాన సంపద కొరకు ఈ కన్యను
ఎన్నుకొనుచున్నాను) అని వరుడు అనగా:
"వృణీధ్వం దా స్వామి"
(ఎన్నుకొంటిరి గావున ఇచ్చుచున్నాను)
అని కన్యాదాత అంటాడు.
" కృతార్ధావయం "
(కృతార్ధులయినాము)
అని కన్య వెదికినవారవరైనా ఉంటే వారంటారు.
అపుడు వరుడు....
" శ్రీ పరమేశ్వర ప్రీత్యర్ధం ధర్మ ప్రజా
సంపత్యర్ధం : స్త్రీయం ఉద్వహే"
(శ్రీ పరమేశ్వర ప్రీతి కొరకు, ధర్మ సంతానము
కొరకు ఈమెనువివాహం చేసుకొనుచున్నాను.
అని అంటాడు.)
లక్ష్మీనారాయణ స్వరూపుడుగా కన్యాదాత వరుని పూజించును.
కాళ్ళు కడిగినపుడు
' ఆవ: పాదావనే జనేర్ ద్వివంత నిర్దహంతుమే'
(ఈ పాదములను రక్షించు దేవతలను
సంకల్పించు ఈ జలములునా శత్రువులను
నిశ్శేషముగా దహింతురు గాక.)
రెండు పాదములను కడిగి అర్ఘ్య పాద్యాదులు
అయిన తరువాత మధుపర్కం (తీయని పానీయం )
మూడు సార్లు వరుడికి కన్యాదాత ఇస్తాడు.
మరికొన్ని మంత్రాల అర్ధాలు మరో టపాలో...
కొసమెరుపు:
కళ్ళు రెండూ తెరచి ఉంచు పెళ్ళికి ముందు,
సగం మాత్రమే తెరువు పెళ్ళితర్వాత. ........బెంజమిన్ ఫ్రాంక్లిన్
Marriage is the institution where the woman loses her the name and the man his solvency ~ Anonymous

పెళ్ళి పుస్తకం - ఆరవ భాగం

2009-11-13T22:52:00.000+05:30

హిందూ వివాహ ప్రాశస్త్యము.
ఆరవ భాగము

వివాహ మంత్రాల అర్ధం
వివాహ సమయం లో వధూవరులతో చెప్పించే మంత్రాలను పరిశీలిస్తే మం ప్రాచీనుల దూరదృష్టి, భావ పటిష్టత ప్రతి పదమ్లో కనిపిస్తుంది. కనీసం కొన్ని మంత్రాలకైనా అర్ధాలు కొత్తగా పెళ్ళి చేసుకునేవారు, పెళ్ళి అయిన వారు గ్రహిస్తే మన సంప్రదాయ తత్వం బోధపడి కొన్ని సందేహాలు తొలగిపోయి లోక కళ్యాణం జరుగుతుంది. అందుకే కొన్ని మంత్రాల భావాలను తెలుసుకుందాం. ఇవి కేవలం జనబాహుళ్యం లో ఉన్నవి మాత్రమే కాని.... ఇవే అన్ని మంత్రాలు కాదు.

కాశీ యాత్రకు వెళ్ళునపుడు(ఇది కొన్ని వర్ణాలలో) బంగారు ఆభరణాలు ధరిస్తారు. అందువలన కలిగే లాభములు ఈ మంత్రములో....

" ఆయుష్యం,వర్చస్యం రాయస్పోష మౌద్బిదం
ఇదం హిరణ్యం వర్చస్వజైత్రాయా విశతాదిమాం "

ఆయుష్షు ను వర్చస్సును, జయమును కలిగించుట కొరకు
నాయందు ఉండుగాక.

" శత శారదా యాయుష్మాన్ జరదృష్టి ర్యదాసత్
మృతాదుర్ల్ప్తప్తం మధువత్ సువర్ణం ధనం జననం
రుణం దార యిషుణం "

నూరు సం వత్సరముల వరకు ఆయువు, ముసలినతనం వచ్చువరకు జీవించి యుండునట్లు చేయును గాక !
నేతి నునుపు ఆరకుండునట్లు గా మంచి రంగు సంపద, జయము దృఢత్వము కలుగును.

" ప్రియం మా కురదేవేషు ప్రియం రాజసు
మా కురు ప్రియం విశ్వేషు గోప్ర్తేసు II"

నాకు దేవతలతోను, రాజులతోను, లోక రక్షకులతోను, ప్రియ సంబంధము కలిగింపుము.
ఈ విధంగా మనం మంత్రాన్ని బంగారాభరణాలను ధరించుతూ చెపుతారు.
కొసమెరుపు:

@ Shaadi ke pehle - Ek Duje Keleye
Shaadi ke baad - Sirf Bachcho Ke Liye
@ Shaadi ke pehle - Dilwale Dulhaniya Le
Shaadi ke baad - Baaki Log Sukhi Ho jayenge
@ Shaadi ke pehle - Chandramukhi
Shaadi ke baad - Jwaalamukhi
@ Shaadi ke pehle - Maine Pyar Kiya
Shaadi ke baad - Ye Maine Kya Kiya?

ప్రతిసారీ మొదటిసారే....

2009-11-11T13:50:00.000+05:30

ప్రతిసారి మొదటి సారిలా

ఏ గది మూలనో
అలజడి రేగి
రాత్రి అదే సమయానికి
కిటికీ తెరిచే సరికి
ఎదురింటి గుమ్మంలో
అఛిద్రమైన చీకట్లో
నాకోసం
నీవు...

కాలం జారిపోతూ
చిదిమిన చివరి
క్షణం నుండి
నీ కోసం
నేను...

చేరువయ్యే కొద్దీ
దూరమై
దూరమయ్యే కొద్దీ
చేరువయ్యే మనకి
ఎచటి నుండో
మూగ రాగాలు
మోసుకొస్తూంది ఆమని

నేనేనా...

ఈ విరితావులపై
ఇంద్రధనుస్సు
వలిగిపోయిందేమో...
నీ కురుల పానుపు మీద
పవళించాలని
పూలన్నీ మత్తుగా
నీ కోసం...

నీవు లేని.....నాలో

2009-11-09T05:14:00.000+05:30

ఏవో భావనలు
నను కమ్మేస్తూన్నాయి
మనిద్దరిని దగ్గర చేస్తూన్నాయి

నీకోసం
సాగరాన్నైనా ఈదగలను
గాలిని గుప్పిట పట్టి
ఎక్కడికైనా ఎగర గలను

కాని ....
నీవు లేని నా హృదయం
ఆకాశం లేని పక్షిలా
నీవు లేని నా ఆత్మ
తప్పిపోయిన లేడిపిల్లలా
నిను చూడని నాకళ్ళు
శిశువు త్రాగక నిండిన
తల్లి పాలిండ్లలా
నీవు లేని నా కన్నీళ్ళు
ఉదయం లేని
మంచు బిందువుల్లా..

అనంత దూరానికి
ఇరువైపులా
మనం
నువు
గుసగుసలాడినా చాలు
వినిపిస్తుంది
నా హృదయానికి
కాదనకు ప్రియా.......

పెళ్ళి పుస్తకం.. ఐదవ భాగం - బి

2009-11-06T05:44:00.000+05:30

హిందూ వివాహ ప్రాశస్త్యము.
ఐదవ భాగము - బి

అన్ని అనుభవాల్లో పురుషుడు స్త్రీ సమానంగా ఉన్నప్పుడే స్త్రీ పురుషునికి అర్ధాంగి అవుతుంది. ఈ వివాహ బంధం ఈ లోకంలోని ఈ జన్మలలో వీరిద్దరిని కలుపుతూనే ఉంటుంది. ప్రపంచ మానవ జీవితంలో ఆయా దేశాల్లో ఆయా సంప్రదాయాల్లో తేడాలున్నా వివాహమనేది ఒక విచిత్రబంధం. మన భారతదేశమ్లో నియమముగా బ్రహ్మచర్యాన్ని గడిపిన స్త్రీ పురుషులు సంఘ శ్రేయస్సును, తమ వంశ శ్రేయస్సును, తమ శ్రేయస్సును దృష్ఠిలో ఉంచుకొని, సకల ధర్మాలకు ఆశ్రయభూతమైన ఈ సంసారం చేసుకుంటారు. దీనిలో మానవ మనస్తత్వం లో ఎన్నో మార్పులు వస్తాయి. బాధ్యత పెరుగుతుంది.
గురుకులం లో విద్యాభ్యాసం ముగించిన తరువాత శిష్యునికి గురువు
" ప్రజాతంతుం మావ్యవచ్చేత్పీ:"
నీ వంశ పరంపరను నశింపజేయకుము. ఇంటికి వెళ్ళి వివాహం చేసుకోమని ఆజ్ఞాపించును.
కనుకనే లోకజ్ఞుడగు మహాకవి కాళిదాసు రఘువంశ రాజులను వర్ణించుచూ..
ప్రజాయై గృహ మేధినాం "...... సంతానం కొరకే గ్రుహస్తులగువారని చెప్పినాడు.
సంతాన ప్రాప్తి అనంతరం వారికి గృహస్తాశ్రమ ఆశక్తి లేదని వాన ప్రస్థులగుదురని కూడ దీనిని బట్టి తెలుస్తుంది.
కనుక మానవ జీవితంలో సకల శ్రేయస్సులకు మూలభూతమైన వివాహబంధం చాలా ప్రశస్తమైనది.
కొసమెరుపు :
ఘనా దేశం లోని ' ఆసాంటే ' అనే తెగలో
వరుడు, వధువు ఇంటి కెళ్ళి తలుపు తడతాడు. లోపలున్న వధువు తిరిగి తలుపు తడుతూ సమాధానం ఇస్తే...వరుడి తల్లి , మేనమామ వధువు ఇంటికి వెళ్ళి వివాహ ప్రతిపాదన చేస్తారు.
వివాహ మంత్రాల అర్ధం...తరువాయి టపాలో...

నో... హి షుడ్ స్పీక్ ఇం గ్లిష్

2009-11-02T22:30:00.000+05:30

నో... హి షుడ్ స్పీక్ ఇం గ్లిష్ దట్సాల్

గత వారం రోజులనుంచి బ్లాగుల్లో వచ్చే విషయాల్లో ముఖ్యంగా " ఐ నెవర్ స్పీక్ తెలుగు " గురించే..
ఇదిలా ఉంటే...దాదాపు రాష్ట్రం లోని చాలా పాఠశాలల్లోనూ ఇంగ్లిష్ లోనే మాట్లాడాలనే నిబంధనని పాక్షికంగా సడలించినట్లు కూడా వార్తలు వస్తున్నాయి.
అయితే మా పాఠశాలలో ఈ విషయంలో ఎప్పుడూ ఎటువంటి ఆంక్షలు గాని శిక్షలు గాని లేవు. కేవలం పిల్లలకి కమ్యూనికేషన్ స్కిల్స్ గురించి వివిధ రకాలయిన కార్యక్రమాలను నిర్వహించడం, కమ్యూనికేషన్ స్కిల్స్ రంగం లో నిష్ణాతులను రప్పించి దాని ఆవశ్యకతని తెలియచేయడం నిత్యం జరు గుతూంటాయి.
ఏదో ఒక టాపిక్ ఇచ్చి విధ్యార్ధు లందరిచేత మాట్లాడిస్తాం. వారి తప్పుల్ని తెలియజేస్తాం. ప్రోత్సాహక బహుమతులిస్తాం.
ఇంకా చెప్పాలంటే...బహుసా రాష్ట్రంలో స్పోకెన్ ఇంగ్లిష్ ఒక సబ్జక్ట్ గా బోధించే అతికొద్ది పాఠశాలల్లో మాదీ ఒకటని గర్వంగా చెప్పగలను.
సిడి ల ద్వారా ఎంతో సమాచారాన్ని వారికి అందచేస్తాం.
గత రెండు సం.రాలుగా కేంబ్రిడ్జ్ యూనివర్సిటీ వారు నిర్వహించే స్పోకెన్ ఇంగ్లీష్ పరీక్షలకు ఇష్టమున్న విద్యార్ధులకు శిక్షణ ఇప్పిస్తున్నాం.
మరో విషయమేమంటే..గత సం.రం. కేంబ్రిడ్జ్ యూనివర్సిటీ వారి అనుబంధ సంస్ఠ(MaaRs International) వారు నిర్వహించిన " స్పెల్ బీ ఇంటర్నేషనల్ " పోటీలలో దేశవ్యాప్తంగా వందల పాఠశాలలు పాల్గొన్నాయి. మా పాఠశాల పిల్లలు రాష్ట్రస్థాయి, అంతరాష్ట్రీయ,అంతర్జాతీయ స్థాయిలో 1,2,3.... స్థానాలు కైవశం చేసుకున్నారు.
ఇక అసలు విషయానికి వస్తాను.
ఈ మధ్య ఒక పేరెంట్ కలిసారు. తన కొడుకు ప్రోగ్రెస్ గురించి మాట్లాడుతూ..
మేడం. మా అబ్బాయి కొంచెం స్లో లెర్నర్. అన్ని సబ్జక్టుల్లోను ఏవరేజ్ గా ఉన్నాడు.
ఫర్వాలేదు. పికప్ అవుతాడు లెండి. ఇపుడిపుడే అలవాటు పడుతున్నాడు.
I know his improvement is slow but steady. అన్నాను.
అంతేకాదు మేడం. వాడికసలు ఇంగ్లీషు మాట్లాడడమే రావట్లేదు. మా చెల్లెలుగారి పాప మా బాబు లాగే ఏడో తరగతి ఫలానా______ స్కూల్లో చదువుతూంది. తను ఇంగ్లిష్ చాలా బాగా మాట్లాడుతాది. బాబుకెందుకు రావట్లేదు.
వస్తుంది. మీరేమీ ఖంగారు పడనఖ్ఖర్లేదు. నెమ్మది నెమ్మదిగా నేర్చుకుంటాడు.
లెర్నింగ్ అనేది నిదానంగా జరుగుతుంది కాని దాని ఫలితాలు మాత్రం శాశ్వతంగా ఉంటాయి.
కాబట్టి మీరు ఆందోళన చెందకండి. తను తప్పకుండా మాట్లాడగలడు.
అంటే..ఈ వారం వార్తల్లో వచ్చిన ఇంగ్లీష్ స్పీకింగ్ కధనాలని బట్టి....మీరు కమ్యూనికేషన్ స్కిల్స్ మీద నిర్వహించే కార్యక్రమాలు సడలిస్తారేమోనని....
అదేం లేదండి..మీకు తెల్సు మాది నిర్బంధ విద్య కాదు. కాబట్టి ఎటువంటి సడలింపులు ఉండవు.
ఆ విషయం తెల్సు. మేడం. We joined him English medium for getting used with English. We are paying thousands and thousands.
ఇంగ్లీష్ మాట్లాడడం రాక పోతే భవిష్యత్తు అంధకారమే కదా.
So I don't know anything. He should speak in English....

ఇలాంటి పేరెంట్స్ ని చూస్తే.....

పెళ్ళి పుస్తకం - ఐదవ భాగం

2009-11-02T05:07:00.000+05:30

హిందూ వివాహ ప్రాశస్త్యము.

ఐదవ భాగము - ఎ

రోజూ ఉదయాన్నే లేచే నాకు ఆదివారం వచ్చేసరికి చాలా బధ్ధకం వచ్చేస్తుంది. ఆయన మాత్రం ఉదయాన్నే లేచి రైతుబజారు కెళ్ళి కూరలు తెచ్చి పడేస్తారు. ఈ వారం ఆయనలేరు. నేనే వెళ్ళాలి. తప్పదు. పిల్లలింకా లేవలేదు. గబగబా తయారయి బండేసుకుని బయలుదేరాను. వచ్చేటపుడు నీలిమ వాళ్ళింటికి వెళ్ళాను.నీలిమ నా టెంత్ క్లాస్ మేట్. పాపం పెళ్ళయిన సం వత్సరానికే భర్త పోయాడు. సర్వీసులో చనిపోయాడు కాబట్టి దానికి రెవెన్యూ డెపార్ట్ మెంటులో జాబ్ ఇచ్చారు. అత్తమామలతో ఇక్కడే ఉంటుంది. మా సర్కిల్ లో తనెపుడూ అసలు పెళ్ళెందుకు చేసుకోవాలి. నేనసలు పెళ్ళేచేసుకోను. ఏకాకిగానే బ్రతికేస్తాను అని అంటూండేది. దీని మీదే ఎక్కువ చర్చలు జరిపేవాళ్ళం. అయితే అవి పెళ్ళి మీద ఎక్కువ అవగాహన లేని రోజులు. గుమ్మమ్లో ముగ్గు పెడుతూన్న నీలిమ నవ్వుతూ ఇంట్లోకి తీసుకెళ్ళింది. అత్తగారికి మావగారికి నేనంటే బాగా ఇష్టం. నీ బ్లాగ్ సీరియల్ ఎంతవరకూ వచ్చిందమ్మా అంకుల్ అడిగారు. బాగానే వస్తుందంకుల్. నాకు బ్రూ కాఫీ అంటే ఇష్టం అని నీలిమకి తెల్సు. ఒక లార్జ్ కప్ నిండా తీసుకొచ్చి తన రూంలోకి తీసుకుపోయింది. ఆనాటి నీలిమకి ఈ నీలిమకి ఎంత తేడా! కళ్ళల్లో కమ్ముకున్న దైన్యం. నీ సీరియల్ చదువుతున్నానే. చాలా బాగా రాస్తూన్నావు. ఈ వారం పెళ్ళి - దాని ఆవశ్యకత గురించి వ్రాయవే. అని తల దించుకుంది. అలాగేనే.. ఎపుడు కలిసినా దాన్ని చూస్తే ఎక్కువ సేపు ఉండలేను. బయలుదేరుతూంటే.. వాడులేని లోటు ఎవరం తీర్చలేమమ్మా. కనీసం నీవైనా అపుడపుడూ వస్తూండమ్మా. మీలాటి వాళ్ళని చూసైనా తను మళ్ళీ పెళ్ళి చేసుకుంటుంది. గేటు వరకూ వచ్చి నెమ్మదిగా ఆంటీ అన్నారు. నా కళ్ళల్లో నీళ్ళు తిరిగినయ్. తల్లి లాంటి అత్తగారు. అందుకే ఈ ఎపిసోడ్ నీలిమకు, నీలిమలాంటి వాళ్ళకూ అంకితం.

వివాహం - ఆవశ్యకత

తనకు జన్మనిచ్చిన తల్లిదండ్రులకు మానవుడు పుడుతూనే ఋణపడుతున్నాడు. ఈ ఋణం తీరాలంటే తన వంశాన్ని నిలబెట్టి పితృదేవతలకు తృప్తి కలిగించాలి. సృష్టి ఆదినుంచీ తన వరకు వచ్చిన వంశాన్ని నిలబెట్టుకోవడానికి అతడు తనకు అన్ని విధాలా తగిన కన్యను వివాహమాడాలి. ధర్మ వివాహం వల్ల పుట్టిన సంతానమే పితృదేవతలను తృప్తి పరుస్తుంది. వంశాన్ని నిలబెడుతుంది. దీన్ని దృష్టిలో ఉంచుకునే సకల ప్రాణులకూ శాంతియుత సహజీవనం, ఇహపర సౌఖ్యాలు కలిగిలా మహర్షులు ధర్మ శాస్త్రాలను బోధించారు. మానవ జీవితానికి నాలుగు ఆశ్రమాలున్నాయి. అవి.
1. బ్రహ్మచర్యం 2. గృహస్థం 3. వానప్రస్థం 4. సన్యాసం
వీటిలో గృహస్థాశ్రమం అన్ని విధాలా అందరికి ఆశ్రయింపదగినది.

యధా మాతార మాశ్రిత్య సర్వేజీవంన్తిజ న్తవ: ! తధా గృహస్థమాశ్రిత్య సర్వే జీవన్తి మానవా: !!

లోకములో ధర్మార్ధకామరూప పురుషార్ధాలలో మానవునికి భార్యవలనగాని పరిపూర్ణత లభించదు,కనుకనే వివాహ సమయమ్లో అనాదిగా వరునిచే ఈ ప్రతిజ్ఞ చేయించడం జరుగుతూంది.
" ధర్మేచ, అర్ధేచ, కామేచ, త్రయైషా నాతిచరితవ్యా " అని కన్యాదాత చెప్పగా వరుడు... " నాతి చరామి " ఈమె నతిక్రమించి నేను నడువను" అని ప్రతిజ్ఞ చేస్తాడు.
ఈ వివాహ మనే సంస్కారం ఉంటేనే లోకం లో మనమెన్నో వైపరీత్యాలను చూస్తూన్నం. అసలు ఈ సంస్కారమే లేకపోతే లోకమెంత అస్తవ్యస్తమై పోతుందో ఊహించలేం. లోకమ్లో అనాదిగా మానవుని బుధ్ధిబలం ,ఆత్మ సంస్కారం పెరుగుతున్నదంటే దానికి పరోక్షంగాను, ప్రత్యక్షంగాను ఈ వివాహం కారణం అని చెప్పక తప్పదు. వివాహం చేసుకునే వయసు వచ్చినా వివాహం చేసుకోని స్త్రీని చూస్తే సంఘం ఏమనుకుంటుంది ? అలగే వివాహం చేసుకోని పురుషున్ని చూస్తే ఏమని అభిప్రాయపడుతుంది. వారు సన్యశిస్తే ఏ ప్రశ్నాలేదు. లేదా భీష్మునివలె ఆజన్మ బ్రహ్మచర్య దీక్ష వహించినా బాధలేదు. కనుకనే స్మృతికారులు స్త్రీ పురుషులకు వివాహ సమయాన్ని గూడా నిర్ణయించారు. ఒక రకంగా ఆలోచిస్తే ఆకాశమ్లో విహరించే చంచలమైన పురుషుని మంస్సనే గాలిపటానికి దార (భార్య) బలమైన దారం లాంటిది. ఆ రెంటి సమ్మేళనమే వివాహం. వివాహం జరిగితే మానవ జీవితం లో ఒక నిండుదనం కనబడుతుంది. భార్యాభర్తలు శారీరకంగా వేరైనా మానశికంగా ఒకటై సమానంగానే అన్ని అనుభూతులను ఒకటిగా అనుభవిస్తూ మధురంగా ఈ వివాహ జీవితం లో కాలం గుడుపుతారు. ఏడు జన్మల సంబంధం వారిద్దరికి ఉన్నట్టు మన హిందూ ధర్మం చెపుతుంది. వేరేచోట్ల పుట్టినా వేరే వాతావరణం లో పెరిగినా వివాహమైన తరువాత ఇద్దరి అనుభూతులూ ఒకటౌతాయి. భగవంతుని సంకల్ప ప్రకారమే వారిద్దరూ తగిన సమయమ్లో దగ్గరౌతారు. కనుకనే " వివాహాలు విధి నిర్ణీతాలు " అంటారు పెద్దలు.
కొస మెరుపు:

కంగ్రా లోయ లోని 'గద్ది' అను గిరిజన జాతిలోపెళ్ళి చాలా ముఖ్యమైనది. పెళ్ళికాని వారు చనిపోయిన తర్వాత వారి ఆత్మలు దయ్యాలై తిరుగుతాయని వారి నమ్మకం. వరుడు తెల్లని బట్టల్లో నుదుటిన విభూదితో శివుడిలా తయారవుతాడు. వరుడు ఒక బిక్షగాని వలె ఒక బొచ్చె (బిక్షగాని చేతిలో ఉండే ఒక గిన్నె)పట్టుకుని వధువు ఇంటివద్ద పిల్లని తనకు ఇచ్చి వివాహం చేయమని యాచిస్తాడు. వధువు తల్లి అతనికి రుచికరమైన ఆహారాన్ని పెట్టటం ద్వారా తమ ఇష్ఠాన్ని తెలియచేస్తుంది. ఆ తర్వాత సాంప్రదాయ వివాహ వేడుకలు జరుగుతాయి.

హిందూ వివాహ ప్రాశస్త్యము - ఐదవ భాగము - బి
తరువాయి టపాలో

పెళ్ళి పుస్తకం --నాల్గవ భాగం

2009-10-27T22:14:00.000+05:30

హిందూ వివాహ ప్రాశస్త్యము.
నాల్గవ భాగము

మొదటి కార్తీక సోమవారం బాగా జరిగింది. మా ఫ్లాట్ లో వాళ్ళందరూ కలిసి రెండు ఆటోలలోనూ,
ఉన్నవాళ్ళు వారి కార్ల లోను శివాలయానికి వెళ్ళాం. పిక్ నిక్ ఎక్కడ జరుపుకోవాలన్న విషయం చర్చకి వచ్చింది..
మగ వాళ్ళందరూ అన్నవరం వెళదామని, ఆడవాళ్ళు దేవిపురం వెళదామని ప్రపోస్ చేసాం.
అప్పటివరకూ ఆలయం పార్క్ లో ఆటలాడుకుంటూన్న పిల్లలకి ఎలా తెలిసిందో ఏమో...
ఒక్కసారిగా వచ్చి ...మేమందరం ఆల్రెడీ డిసైడ్ అయి పోయాం. లాస్టియర్ కూడా మీరు తీసుకెళ్ళిన చోటుకే వచ్చాం .
ఈసారి అలా జరగడానికి వీల్లేదు. మేమంతా ' జూ ' కి వెళ్ళాలనుకుంటూన్నాం. వస్తే మీరు మాతో రండి.
లేదంటే గుంటూరు తాతయ్య ని తీసుకుని మేమంతా జూకి వెళతాం.
మా అందరి చూపులు ఒక్క సారిగా గుంటూరు తాత గారి మీదకు మళ్ళినయ్...
ఇందులో ఆయన ప్రమేయమేమి లేదు. ఇది మా స్వంత నిర్ణయమే.
మా ఫ్లాట్ లలో ఒక ఫామిలీ గుంటూరునించి వచ్చి సెటిల్ అయ్యారు.
వారింట్లో పెద్దాయనకి పిల్లలంటే చాలా ఇష్టం.
అందరూ ఆయన్ని గుంటూరు తాతయ్య అని పిలుస్తారు.
ఇంతలో రెండవ ఫ్లోర్ లో ఉండే చిన్నిపాప మేఘన (3rd class)
నా దగ్గరకి వచ్చి ..
Hanti, I have never seen a zoo, hanti. I want to see animals.
I want to climb on elephant. Please hanti, let us go to the zoo hanti,
please hanti, please hanti.....
మేఘన అంటే అందరకీ ఇష్టమే. అయినా మిగిలిన వాళ్ళని తృణీకరించలేము.
O.K. O.K. ఇళ్ళకి వెళ్ళాకా మూడు ప్లేసులకి డ్రా వేద్దాం.
ఆ మర్నాడు డ్రా తీయడము అందులో జూ రావడమూ పిల్లలందరికి ఆనందమైపోయింది.
చక చకా ఏర్పాట్లు కూడా జరిగిపోయాయి.
భోజనాలయిన తర్వాత ఏదో వినోద కార్యక్రమాల్లో భాగంగా..డ్రాలో నేనొక ఉపన్యాసం ఇవ్వాలి.
అప్పటికే మావాళ్ళలో కొద్దిమందికి నా బ్లాగోపాఖ్యానం గురించి తెలిసింది..
వివాహ స్వరూపం గురించి చెప్పమన్నారు.
మావారు నాకేసి గర్వంగా చూడటం నాకెంతో ఆనందంగా ఉంది.

అందరికీ నమస్కారం.

కార్తీక మాస వన భోజనాల పర్వ దినాన మనందరం ఇలా కలసి ఉండడం నాకు చాలా ఆనందంగా ఉంది.
మీలో చాలామంది పెళ్ళి చేసుకున్నవారే..పెళ్ళిళ్ళు చేసినవారే..
ఇపుడు నేచెప్పబోయేవిషయాలు మీకందరకు తెలిసినవే.
అయితే మన హిందూ సంప్రదాయం లోని వివాహ వ్యవస్ఠ కి విదేశాలలో మంచి పేరుంది.
దురదృష్ఠవశాత్తూ మన హిందువులు మాత్రం పాశ్చాచ్య నాగరికతకై పాకులాడుతున్నారు.
ఈ సాంప్రదాయాన్ని మన భావితరాలకి అందించాలనే తపనతో నా బ్లాగులో హిందూ వివాహ ప్రాశస్త్యం గురించి టపా చేస్తూన్నాను.
ఐతే ఈరోజు మీకు సింపుల్ గా వివాహ స్వరూపం గురించి వివరిస్తాను.

హిందూ వివాహ స్వరూపము.
పెద్దలు సుముహూర్తం నిశ్చయం చేసిం తరువాత అంకురారోపణం, దేవతాహ్వానం చేస్తారు.
వరుడు తన ఇంట్లోనే స్నాతక వ్రతం( కొన్ని వర్ణాలలో మాత్రమె) చేసుకుంటాడు.
వధూవరులు ఇద్దరూ మంగళ స్నానాలు చేస్తారు. వినాయకుణ్ణి వివాహం నిర్విఘ్నంగా జరగాలని పూజించి పుణ్యాహవాచనం చేస్తారు. కంకణాలను పూజించి ముందు వరునికి కడతారు.
ఇవెందుకు కడతారో తెలుసా ?
కంకణం కట్టడం వలన ఎటువంటి మైలలు వచ్చినా అతనికి సోకవు.
తరువాత కన్యచే గౌరీపూజ, కంకణపూజ చేయించి కన్యకు కూడా కంకణం కడతారు.
తరువాత వరపూజ.
వరపూజ అంటే...కన్యాదాత వరుడి కాళ్ళు కడిగి మధుపర్కం ఇస్త్తాడు. వరుడికి వస్త్రాభరణాలిస్తారు.
తరువాత సన్నటి తెర ను మధ్య పట్టుకుని కన్యను రప్పించి కన్యాదానం చేస్తారు.
తరువాత ఇతర దానాలు కూడా చేస్తారు.
వధూవరుల గోత్రనామాలతో పూజ చేయిస్తారు.
కన్నాదాత వరునిచే ధర్మార్ధకామాలలో ఈ కన్యను విడువనని ప్రమాణం చేయిస్తాడు.
సుమూహర్త సమయమ్లో వధూవరులిద్దరూ ఒకరి తలపై ఇంకొకరు జీలకర్ర, బెల్లం పెట్టి
అందరి సమక్షమ్లో దంపతు లైనట్లు పరిగణింపబడతారు.
నిజానికి వివాహం అంటే ఇదే. మంగళ సూత్రధారణ కాదు.
తరువాత తెర తీస్తారు.
శుభ సమయం లో వరుడు వధువును చూస్తాడు.
నూతన దంపతలిద్దరినీ పక్క పక్కన కూర్చోపడతారు.
తరువాత కన్య శిరస్సు మీద కాడి ( బండికి గాని, నాగలికి గాని
రెండెద్దుల మధ్యఉండే కర్ర )కి ఉండే
రంధ్రం గుండా బంగారు వస్తువు ని ఉంచి వరుడు అభిషేకం చేస్తాడు.
వధువుకి కొత్తబట్టలు ఇస్తారు.
వరుడు వధువు నడుమునకు ధర్మతాడు కడతాడు.
తదుపరి పెద్దలందరూ కళ్ళకి అద్దుకున్న మంగళసూత్రాన్ని వధువు మెడలో
రెండు గట్టి ముళ్ళనూ, మూడవది వదులుగానూ కడతాడు.
పెద్దల ఆశీస్సు లు పొంది, తలంబ్రాలు పోసుకుంటారు.
బ్రహ్మ ముడులు వేసిన తరువాత కన్య చేయి పట్టుకుని వరుడు
ఏడడుగులు నడిపిస్తాడు.
తరువాత ప్రధాన హోమం , ప్రవేశ హోమం, సదశ్యం , నాకబలి ,
అప్పగింతలు వగైరా జరుగుతాయి.
ఇది స్థూలంగా వివాహ స్వరూపం.

అందరి కరతాళ ధ్వనుల మధ్య నేను
మావారి కళ్ళల్లో సన్నని కన్నీటి పొర గమనించక పోలేదు....

వివాహ ప్రశస్తి ...మరో టపాలో..

మాయా ఏంజిలౌ

2009-10-25T20:58:00.000+05:30

అమెరికా జాత్యహంకారపు పడగ నీడలోఅణగద్రొక్కబడిన నల్ల జాతి బానిస జీవుల జీవితాలలో తమ రచనలతో వెలుగులు నింపిన అతికొద్దిమంది నల్లజాతీయులలోమాయా ఏంజిలౌ ఒకరు.విలక్షణమైన వ్యక్తిత్వం, నిర్మొహమాటమైన వైఖరి ఈమె రచనల్లో కనిపిస్తుంది. బహుముఖ ప్రజ్ఞాశాలి వివిధ రచనా ప్రక్రియలలో అసాధారాణ ప్రతిభ ఆవిడ సొంతం. Still I rise, On the pulse of morning, Life doesn't frighten me etc., అనే కవితలుI know why the caged bird sings, The heart of a woman అనే ఆత్మకధలు ఆమెకి బాగా పేరు తెచ్చిన రచనలు.

Still I rise

నీ దుర్భాష్యాలతో, అబధ్ధాలతో
నాకు హేయమైన చరిత్ర సృష్ఠించవచ్చు
నీ ఉక్కు పాదాలతో నను భూస్థాపితం చేయవచ్చు
అయినప్పటికీ నేను ఉదయిస్తాను
గోధూళినై..

నా ఆత్మవిశ్వాశం నిన్ను కలవర పరుస్తోందా?
నీవెందుకు దుఖ:సాగరంలో మునిగిపోయావు ?
నా ఇంట్లో చమురుబావులు న్నంత
గర్వంతో నేను నడుస్తున్నందుకా ?

సూర్య చంద్రుల్లా
తీరాల్ని తాకే అలల్లా
ఉవ్వెత్తున ఎగిసె పడే
ఆశల ఉప్పెనలా ఉదయిస్తాను

ఆత్మఘోషతో అచేతననై
కన్నీటిధారలతో తలదించి విగతనై
నీముందు నిలబడాలనుకుంటున్నావు కదూ..

నా అహంకారం నిను బాధిస్తూందా ?
ఎందుకంటే నా పెరట్లో
నేనేవో బంగారు గనులు తవ్వుతున్నంత
ఆనందంగా వున్నాను..
ఇదొక ఘోర విపత్తనిపిస్తోందా?

నీ మాటల తూటాలతో
నను కాల్చివేయవచ్చు
నీ చూపుల్తోనను
తునాతునకలు చేయవచ్చు
నీ ద్వేషాగ్నిలో
నను భస్మం చేయవచ్చు
అయినప్పటికీ ఉదయిస్తాను
అనంత వాయువునై

నా సౌందర్యం
నిను కలవర పెడుతోంది కదూ ....
నా వాంఛలు తీరినట్లు
నేనేదో కానుకలు పొందుతున్నట్లు
నే చేస్తూన్న నాట్యం
ఆశ్చర్యంగా ఉందికదూ ...

చరిత్ర చీకటి పుటల్లోంచి
ఉదయిస్తాను..
గాయాలమయమైన గతం
మూలాల నుండి ఉదయిస్తాను

ప్రతికెరటం లోను
ఉవ్వెత్తున ఎగిసిపడే వెల్లువతో
జలిస్తూ విశ్వవ్యాపితమైన
నల్ల సముద్రాన్ని నేను

భయాన్నీ, భీకర రాత్రులను చేధించి
సర్వశోభితమైన అరుణ కిరణాల్లా
ఉదయిస్తాను
తరతరాల వారసత్వ
పోరాట పటిమను
మీ కందిస్తూ
బానిస బ్రతుకుల పాలిట
ఒక అందమైన స్వప్నంలా
ఒక ఆశలా
ఉదయిస్తాను...

పెళ్ళి పుస్తకం - మూడో భాగం.

2009-10-24T04:37:00.000+05:30

హిందూ వివాహ ప్రాశస్త్యము.

మూడవ భాగం.

దీపావళీ దగ్గరపడిందంటేనే మనసెంతో ఆనందంగా ఉంటుంది.ఆ తర్వాత కార్తీకమాసం నిత్యపూజలు భగవన్నామస్మరణ ..మనసంతా ప్రశాంతంగా ఉంటుంది. మొదటి కార్తీక సోమవారం పూజకి సామాన్లు కొనడానికి శివాలయం వీధి వైపు బయలుదేరుతుండగా విజయ నుంచి ఫోనొచ్చింది. నా క్లాస్ మేట్. ఈ మధ్యే బదిలీ అయి వచ్చారు. ఫోను లిఫ్టు చేసాను.
హలో విజయా! బాగున్నావా?
బాగున్నానే..
నిన్న రాత్రే చాలా సేపు మాట్లాడుకున్నాం. వారం లో రెండు మూడు సార్లు ఫోనులో మాట్లాడుకుంటాం. నెలకొకసారైనా వీకెండ్ ఏ హోటల్లోనో ఎంజాయ్ చేస్తాం. అయితే ఏమిటి సంగతి ఇంత సడన్గా.
ఏమిటే విజయా!
ఆ. ఏమ్లేదే.మేము శ్రీకాకుళం లోఉన్నపుడు మా మరిది వికాశ్ లేడా. అతను ఓ అమ్మాయితో ప్రేమలో పడ్డాడే. ఎలగోలా అతని మనసు మళ్ళించి, ఇక్కడకి ట్రాంసఫర్ పెట్టించుకుని ఇక్కడకు వచ్చేసాం. కానీ ఇప్పుడు అతను ఉదయం నుంచి కనిపించట్లేదే.
అక్కడ అమ్మాయి కూడా...
లేచి పోయారా.....
హా. అంతే కావచ్చు .మాకేమో ఈ ఊరు కొత్త. స్టేషన్ లో రిపొర్టివ్వడాలు.... మీవారికి వీలైతే..
ఏయ్. ఏంటే అలా కంగారు పడి పోతావు. మేమిద్దరం బయలుదేరి వస్తున్నాం.
బజారు నించి వస్తూ..వాళ్ళింటికి వెళ్ళాం. ఇల్లంతా శ్మశాన వాతావరణం. పిల్లలకేమీ పెట్టినట్లు లేరు. మేంతెచ్చిన ప్రసాదాలు ఆబగా తినేసారు. మావారు, విజయ హస్బెండ్ బయటకి వెళ్ళిపోయారు.
విజయ వాళ్ళ పెద్దపాప తన్మయి చాల ఇంక్విసిటివ్. మెల్లగా నాదగ్గరకు వచ్చి చేరిపోయింది. ఆంటీ. పెళ్ళిళ్ళ గురించి నీకు బాగా తెలుసని అమ్మ ఎన్నోసార్లు చెప్పింది.
ఇపుడు బాబాయి ఎవరిష్ఠం లేకుండా పెళ్ళి చేసుకుంటున్నాడు కదా. ఇదేం రకమయిన పెళ్ళి. వయసుకి మించిన ప్రశ్న అయినా చెప్పాలని అనిపించింది. క్లుప్తంగా చెప్పాను.

ఇదుగో అప్పుడే ఈ విషయాలన్నీ బ్లాగులో పెట్టాలన్న ఆలోచన వచ్చింది.

మన పూర్వీకులు వివిధ రకాల వివాహాలని ఒక పద్యం లో చక్కగా పొందు పరిచారు.

బ్రాహ్మాదైవస్తదైవార్ష:ప్రాజాపత్య:తధాసుర:

గాంధర్వో రాక్షస్తశ్చైవ పైశాచశ్చాష్టయో ధమ:

1. బ్రాహ్మం 2. దైవం 3. ఆర్షం 4. ప్రాజాపత్యం

5. అసురం 6. గాంధర్వం 7. రాక్షసం 8. పైశాచం.

1. బ్రాహ్మం: సర్వ లక్షణ సంపన్నుడైన వరుని ఆహ్వానించి యధాశక్తిగా
అలంకరించిన కన్యను అతనికి ఉదక పూర్వకంగా
దానం చేస్తే అది బ్రాహ్మ వివాహ మంటారు. ఇలా వివహం చేసుకున్న దంపతులకు పుట్టిన వాడు పదితరాలకు పితృదేవతలను, పదితరాల వరకూ పుత్రాదులను, పవిత్రులను చేస్తాడు.

2. దైవం : యజ్ఞాన్ని చేసేటప్పుడు అక్కడ ఋత్విక్కుగా వున్న వరుడికి అలంకరించిన కన్యను దానం చేయడం దైవవివాహమంటారు. ఇలా పెండ్లి చేసుకున్న వారికి పుట్టినవాడు 7 తరాల ముందువారిని, 7 తరాల తరువాత వారిని కూడా తరింపజేస్తాడు.

3. ఆర్షం : రెండు ఆవులను తీసుకుని కన్యాదానం చేస్తే అది ఆర్షవివాహ మౌతుంది. ఇలా పెండ్లి చేసుకున్న వారికి పుట్టిన వాడు ముందు మూడు తరాలను తర్వాత మూడు తరాలను తరింపజేస్తాడు.

4. ప్రాజాపత్యం : " కలిసి ఉండి ధర్మాన్ని ఆచరించండి " అని ప్రతిజ్ఞ చేయించి కన్యాదానం చేస్తే అది ప్రజాపత్యమౌతుంది.
ఇలా పెండ్లయినవారికి పుట్టిన వారు ముందు 6 తరాలను, తరువాత 6 తరాలను తనను కూడా తరింపచేస్తాడు.

5. అసురం : వరుని దగ్గర డబ్బు తీసుకుని కన్యాదానం చేస్తే అది అసుర వివాహం అవుతుంది.

6. గాంధర్వం : పరస్పరానురాగాన్ననుసరించి రహస్యంగా చేసుకునేది గాంధర్వ వివాహం.

7. రాక్షసం : యుధ్ధం చేసి కన్యనపహరించి చేసుకుంటె అది రాక్షస వివాహం అవుతుంది.

8. పైశాచం : కన్యను మారువేషమ్లోనో, నిద్ర పోతూండగానో అపహరిస్తే అది పైశాచ వివాహమౌతుంది.
కొస మెరుపు:
ఘనా దేశం లో ఆసాంటే అను తెగవారిలో మగవాడు వధువు ఇంటి తలుపు తడతాడు. వరుని తల్లి ,అతని మేనమామ వధువు ఇంటి కి వెళ్ళి వివాహాన్ని పర్తిపాదిస్తారు.

వివాహ స్వరూపం ....మరో టపాలో...