నది నడచిన జ్ఞాపకం

సంక్రాంతి వచ్చిందంటే
మా ఊరిలో దాచుకున్న
జ్ఞాపకాల మూటని విప్పుకుంటాను
అడుగడుగున గొబ్బెమ్మలు
అందమైన ఆడపడుచులు
గొబ్బెమ్మల ఆటపాటలు
గంగిరెడ్ల నృత్య విన్యాసాలు
డూడూ బసవన్న గంటల గలగలలు
హరిదాసుల హరినామ స్మరణలు
ఇలా ఎన్నో ఎన్నెన్నో
అదృ శ్య దృశ్యాల మీద
నగ్నంగా విహరిస్తూంటాను

నాఊరి గడప గడపనుండి
సంక్రాంతి సంస్కృతీ నది
వీధి వీధినా నడిచిన జ్ఞాపకం....

నగరీకరణ వరదలో
నా ఊరు..
నీరు లేని నదిలా
నగరంలో నేను
నీరులేని చేపలా


బ్లాగ్మిత్రులందరికీ సంక్రాంతి శుభాకాంక్షలు

మళ్ళీ వికసించనీ...

ఇదిగో ఇక్కడే
నా బాల్యం లో
సీతాకోక చిలుకలు
రెక్కల్ని రెపరెప లాడిస్తూ
ఋతువుల్ని రాల్చి వెళ్ళిపోయాయి.
కాని అవి వాలిన పూలు
నాలో ఇంకా వాడిపోలేదు....
వర్తమాన పొరల్లో
గతం ఎంత చుట్టుకుపోతున్నా
నాలో స్మృతులు మాత్రం
మంచు బిందువంత
స్వచ్చంగా ఉన్నాయి....
ఇదిగో ఇక్కడే
నా బాల్యంలో
నే నడిచిన దారుల్లో
చెరిగిపోయిన
నా పాదముద్రికలు
నాకింకా కనిపిస్తూనే ఉన్నాయి.....
అదృశ్య దృశ్యాలన్నీ
హృదయాకాశంలో
నక్షత్రాల్లా మెరుస్తూనే ఉన్నాయి.
మనసంతా
వెన్నెల వెలుగుతూనే ఉంది.....
నా బాల్యం
నా వైపొకసారి చూసి
ఎటో వెళ్ళి పోయింది
గంట మ్రోగంగానే
పరుగులు తీసిన బడి పిల్లాడిలా
నేను మాత్రం
ఖాళీ అయిన తరగతి గదిలా .....
ఓ ప్రభూ !
అన్నిటికీ పునర్జన్మ నిచ్చావు
కాలానికి తప్ప
అందమయిన ఆ పుష్పాన్ని
మళ్ళీ వికసించనీ...
మధురమయిన ఆ రోజుల్ని
మళ్ళీ ఉదయించనీ....